«Biir kun» etno-pop cır bäygeseneñ Gran-pri iyase – Sälät weteranı Aydar Söläymanow ← kire kaytirga

Bu könnärdä etno-pop «Biir kun» cır bäygeseneñ näticäläre bilgele buldı. Gran-pri iyase bulıp Tatarstan wäkile, olı dustıbız, Tatarstan Respublikasınıñ atkazangan artistı, 2014-nçe elda «Tyurkwidenie» bäygeseneñ finalistı Aydar Söläymanow saylandı.

«Biir kun» – etno-pop janrındagı töbäkara zamança cır bäygese. Bäygedä Rässäyneñ kiläse 11 töbägennän wäkillär katnaştı: Altay Respublikası, Başkortostan Respublikası, Buryatiya Respublikası, Kamçatka ölkäse, Tatarstan Respublikası, Tıwa Respublikası, Udmurtiya Respublikası, Çuwaşiya Respublikası, Çukotka awtonomiya okrugı, Saxa Respublikası (Yakutiya) häm Yamalo-Nenetskiy awtonomiya okrugı.

Üzeneñ xis-kiçereşläre belän bezneñ belän Sälät weteranı Aydar Söläymanow urtaklaştı.

- Ni öçen katnaşırga uyladıgız?

- Härber bäyge – iñ berençe çiratta, üz-üzeñne tikşerü! Tatarstan danın yaklau – härçak maktaulı häm cawaplı! Ä yaratkan respublikaña ciñü alıp kaytu – ikelätä küñelle. Näk menä şul säbäple min bäygelärdä katnaşam da inde.

- Sezneñ öçen festiwalda iñ katlaulısı närsä buldı?

- Bäyge wakıtında iñ awırı bulıp yakutiya salkınnarın äyter idem. Bäyge könendä Yakutiyadä -42 gradus ide.

- Üz ömetläregezne niçek sınadıgız? Ciñüne kötkän idegezme?

- Min berkayçanda aldan uylap kuymıym. Bäyge – bik katlaulı eş. Şunısı kızık, tege yaki bu jyuri ägzasınıñ niçek itep tawış birgänen berniçek belep bulmıy.

- Üzegez kem öçen cannatıgız?

- Döresen genä äytkändä, Kırım häm, älbättä, Başkortostan öçen cannatım.

- Icadi üseştä kiläse adımıgız nindi?

- Icat berkayçanda ber urında tormıy. Artist, muzıkant härwakıtta da üseştä, yaña formalarnı, cırlarnı ezläüdä. Tatarstannı, tatar cırların, tatar mädäniyaten dönya arenasına alga etärergä.

- Tatar telenä mäxäbbät, xörmät xise sezneñ balaçaktan uk sizelep tordı. Anıñ çagılışın bez Sälättä, alannarda çagılganın kürdek. Sälättäge yulıgız turında söyläp kitsägez ide.

- Sälät oeşmasında min inde küptännän. Üz wakıtında «Sälät-Zäy» alanına da nigez saldık. Biredä äydaman, ölkän äydaman wazıyfaların başkardım. Berniçä tapkır «BikaFest» festiwalendä dä katnaşırga mömkinlek tudı, läkin şuña da karamastan monda berniçek tä ciñä almadım. (Kölä)

- «BikaFest» festiwalendä ciñü yaulıy almasagız da, kiläçäktä sezne jyuri ägzası bularak kürergä telibez! Sezne älege häm başka proektlarda kürergä bik şat bulırbız!