«Bezneñ fiker» yaña sezonın başladı. Sin dä kuşıl! ← kire kaytirga

27-nçe sentyabr könne, Sälät yortında «Bezneñ fiker!» tatar telendäge diskussiya klubınıñ yaña sezonı açılışı uzdı. Tantanaga Kazan şähäreneñ 129-nçı, 27-nçe mäktäpläre, 2-nçe gimnaziya, 149-nçı litsee ukuçıları, pedagogika kölliyate studentları kilgännär ide. Alar barısı da tatar telen kamil belergä, üz pozitsiyalären argumentlarga, publika aldında çıgış yasarga öyränergä omtıla.

Yaña sezonnıñ açılu tantanasında Sälät aktiwistları häm liderları katnaştı.

«Sez kübäü. Häm bu bik şäp! Tatar telen yaratuçılar da küp, dimäk. «Bezneñ fiker!» Sälät proektları arasında bıel sezonın berençelärdän bulıp açıp cibärä. Yaña sezonnı yaña köçlär belän karşı alıyk! Debatlar mäktäbendä katnaşıp oratorlar ostalıgıgıznı arttırıgız, fikerläü ofıkların kiñäytegez. Açıluıgız belän kotlıym!» – dip «Sälät» Fondınıñ başkarma direktorı Timur Söläymanow sälamläde.

«4 el elek zur, dus-tatu komandabız belän şuşı proektnı başlagan idek. Şundıy gıybarä bar: eşçänlek 3 eldan artık başkarılsa, anıñ kiläçäge bar, ul inde däwamlı digän süz. «Bezneñ fiker!» öçen min bik şat, ul, çınnan da, yaşlärebezgä xezmät itep yaşäsen!» – dip belderde «Respublika debatow» proektı citäkçese Ammar Al-Ansi.

«Bez älege proekt belän küptännän dus. Härwakıt bik yaratıp, yakın itep kiläbez. Älege proekt tatar yaşlärenä üz tellärendä aralaşırga gına tügel, oratorlık ostalıgın arttırırga, zur auditoriya aldında çıgış yasarga da öyrätä. Bügen biredä bez kazıy bularak çıgış yasıybız. Ä sezgä uñışlar teläp kalabız!» – di Rädif-Rüzäl Äxmädiewlar.

Sälät weteranı Ilsur abıy Nafikow ta «Bezneñ fiker!» proektı turında fikerlären citkerde: «“Bezneñ fiker!”» klubı bäxäs mäydançıgı bularak, kızıklı ber proekt, mömkinçelek häm inde yaşlär öçen üzläreneñ fikerlären yörtü, tudıru häm dälilläü öçen yaxşı ber mäktäp dip äytsäk döres buladır. Kiläçäktä yaşlär tuplana, «Bezneñ fiker!»ne tanıp kilälär, bu proektta katnaşırga telilär. Şuña kürä ägär dä tatar yaşläre nindi bulsa da ber urında tuplanıp, üzläreneñ fikerlären urtaklaşıp, ber näticägä kilä alalar ikän, bu wakıtta tatar milläteneñ kiläçäge bar häm yaktı digän süz».

Proektnıñ citäkçese Läysän Miñnullina alda torgan sezon turında söyläde, şunnan soñ berençe uen uzdı. Start birelde. Uñışlar telibez!

Här çärşämbe könne, 18:00, Sälät yortında kötep kalabız!