Bloger Alinä Gimaltdinowa: «Unikallegegezne alga söregez» ← kire kaytirga

«Sälät» uku-ukıtu forumınıñ dürtençe smenası - Media Bilär Forum (Media/Media) balalarnıñ sotsial media ölkäsendä aldıngı texnologiyalärne öyränüenä bagışlana.

Forumga Rossiya häm Tatarstannıñ kürenekle belgeçläre kilä, alar balalar belän täcribäläre belän urtaklaşa häm alarga kiläçäk hönärlärendä orientlaşırga yardäm itä.

Bez marketing, SMM häm şäxsi brendnı tanıtu buença belgeç — Alinä Gimaltdinowa belän aralaştık.

Alinä, sez spiker bularak inde berniçä tapkır Sälätkä kildegez. Bıel forumga kilüe niçek sezgä?

Min inde dürtençe tapkır biregä kiläm häm kilgän saen mondagı üzgäreşlärne küräm. Berläşmäneñ sıyfatı eldan — el yaxşıra, yaña formatlar barlıkka kilä, ämma Sälätneñ nigeze — anıñ nizamätläre, masştabı häm balalar öçen zur faydası üzgärmi.

Sezneñ ostaxanägez närsägä bagışlangan?

Ostaxanälärdä bez balalar belän brend buldıru häm anı tanıtu nigezläre belän şögıllänäbez. Min sälkeşlärgä yunäleşenä karamastan, teläsä nindi proektnı yaştän ük tözüneñ yaxşırak buluın añlatırga telim, çönki bu kiläçäktä maksatlarga ireşü häm karera öçen faydalı bulaçak.

Uku-ukıtu programması kısalarında bez praktik däreslär dä ütkäräbez —berär sälkeşne saylıybız häm anıñ kızıksınuları nigezendä bergäläp anıñ şäxsi brendın uylap tabarga tırışabız.

Şulay uk ostaxanälär katnaşuçılarga üzlären onlayn mäydançıklarda kürsätergä öyränergä yardäm itä, bu faydalı, kızıklı häm kiläçäktä tabış kiterä ala.

Balalardan kaytawaz kiläme?

Balalardan bik cılı kaytawaz kilä. Min alarga blogerlık, şäxsi brend häm anı tanıtu teması aeruça kızıklı buluın kürdem. Sälkeşlärneñ ber ük ostaxanägä berniçä tapkır kilüe - minem öçen yaxşı kürsätkeç.

Mäsälän, bügen minem yanga biyu belän aktiw şögıllänüçe häm üz tormışın anıñ belän bäylärgä teläüçe kız kilde. Bez anıñ belän karera üseşeneñ berniçä etabın (ukuçı, osta, belgeç häm ostaz) häm alarda üzeñne niçek kürsätergä kiräklegen karadık.

Xäzer ul – ukuçı, biergä öyränä, sotsial çeltärlär alıp bara, anda köndälek stildä üz tormışı, repetitsiyalär häm başka küp närsälär turında söyli. Anıñ auditoriyase anıñ kem ikänlegen häm närsä belän şögıllänüen añlıy.

Täcribä tuplagaç häm kiräkle künekmälär buldırgaç, kız osta statusına küçäçäk — ul professional çıgış yasıy, ostaxanälär ütkärä häm akça eşli ala başlayaçak. Tagın da kübräk täcribä tuplap, ul belgeç bulaçak häm belemnäre belän balalar belän urtaklaşa başlayaçak. Häm soñgı etap - ostaz, anda ul üz biyu mäktäben aça alaçak.

Kiläçäktä anıñ mäktäbenä küp klientlar kilsen öçen ul xäzer ük professional yulın tözi. Ul üze turında niçek häm kayda belderergä kiräklegen belsen öçen bez aña här etap öçen centekle kontent-plan yazdık.

Marketing ölkäsendä uñışka ireşü öçen forumda katnaşuçılarga nindi kiñäşlär birä alasız?

Bez icat yagınnan şundıy irekle häm küpkırlı dönyada yaşibez, biredä härkem telägän eşe belän şögıllänä, şuña kürä min härkemgä, berençe çiratta, üz unikallegen tabarga häm anıñ turında belgertergä kiñäş itärgä telim. Anıñ yardämendä sez üzegezne kürsätä alasız häm däräcälärgä ireşä alasız - bu uñışnıñ töp sere.

Şulay uk balalarga härwakıt üz-üzlärenä ışanırga, konstruktiw tänkıytne genä tıñlarga häm daimi üseştä bulırga telim. Distsiplina - maksatlar kuyunıñ häm alga barunıñ töp yardämçese.