«Bolgar-Tugan tel 2017» – bar töbäklärgä dä ber yöräk ← kire kaytirga

IV  Töbäkara «Bolgar-Tugan tel» çatırlı alanınıñ 2-nçe smenası berniçä kön elek yabık dip belderelde. Ä xis-kiçereşläre haman yöräktä. Nibarı 7 kön eçendä Räsäyneñ törle poçmaklarınnan cıelgan balalar häm alarnıñ äydamannarı zur ber gailägä äwerelde. Biredä härçak yaratu häm xörmät xökem sörde.

Ikençe smenanıñ geografiyase, çınnan da, bik kiñ: Xantı-Mansiysk, Ekaterinburg, Orenburg, Mäskäü, Udmurtiya Respublikası, Mariy El, h.b. Balalar törle cirlärdän cıelgan bulsalar da, üzara urtak telne tiz taptılar. Berençe könne cıelışıp üz alannarınıñ älämnären bizädelär.

Koyaştan da yaktırak balalarnıñ elmayuları  balkıdı, lager territoriyasendä şat balalar awazı sürelmäde. Bu alarga alan oşıy digän süz.

«Biredä barısı da şundıy äybätlär! Bik dustanä! Ak mäçetkä häm tıyulıkka säyaxät bik oşadı, ä kalligrafiyadän ostaxanä küñelemdä ozakka saklanır. Öygä kaytası da kilmi! Ikençe elga da mömkinlek bulsa kiläse ide», – dip belderde Ekaterinburg kızı Diana Şäyaxmätowa.

«Döresen genä äytkändä, biregä kilgänçe tatar telen iske tellär rätenä kuep yöri idem. Tik monda eget-kızlar şundıy matur söyläşälär! Şundıy küñelle! Biredäge moxit çüz belän äytep-añlatıp betermäslek. Kaytası, çınnan da, kilmi. Katnaşuçılar barısı da şundıy yaxşı küñellelär. Sagınaçakmın inde», – di Udmurtiyadän kilgän Alinä Kasimowa.

«Miña biredäge moxit häm duslık oşadı. Tatar telen şundıy räxät itep ukıtalar. Ädäbi tatar telen, diyargä kiräkter. Spikerlar belän uzgan oçraşular da ilhamlandırgıç köçkä iya», – di Mariy Eldan Adeliya Ismägıylewa.

«Kiçke çaralarga tañ kaldım. Alar ber-bersen kabatlamıy häm şundıy küñelle. Ekskursiya dä bik küñelle uzdı, Bolgar turında üzem öçen küp yañalık beldem. Keşelär barısı da açık küñelle, smenadan kitäse dä kilmi», – dip belderde Kirow ölkäsennän kilgän Ayrat Salaxiew.

Küñelle, bar tatar mentalitetın çagıldıruçı Sabantuy, futbol, woleybol turnirları, «Bez Bolgarda» icadi kwestı (biredä balalar mirasların yaulap aluçılardan sakladılar), üz eşeneñ ostaları belän oçraşular, kızıklı ostaxanälär – katnaşuçılarnı berläşterde, duslaştırdı. Balalar alannıñ gazetası östendä eşlägändä üzlären çın korrespondentlar itep toydılar.

«Iñ möhime balalar ukıdılar, duslar taptılar, istäleklären baettılar, üz kulları belän eşlänmälär yasarga öyrändelär. Sälkeşlär bik maksatçan, kızıksınuçannar. Alarnıñ yaş kategoriyaläre dä şundıy, bez alarga öyräner öçen yardäm kulı gına suzabız. Ukıgız, belem tuplagız! Yal itä dä belegez. Miña kalsa, «Bolgar-Tugan tel»  alanı küñel belän dä, tän belän dä yal itep bula torgan urın ul», – dip citkerde alannıñ programma direktorı Alsu Salawatowa.

«Smena bik şäp uzdı! Katnaşuçılar bik aktiw! Berkayçan balalarnıñ minnän aldarak irtänge zaryadka kilgänen kürgänem yuk ide äle, ä biredä bu gadätkä kerep bette. Sabantuy bik matur uzdı. Wakıtıgıznı buşka uzdırmagız, här mizgeldän yam tabıgız!», – di smenanıñ sport yunäleşe citäkçese Ilfat Wäliew.

Quiz time intellektual uenı, KWN, «Aulak öy», icadi kontsertlar här keşeneñ xäterendä mäñgegä kaldı.

«Lagerneñ art-direktorı bulganlıktan, anıñ mädäni çaraların uylau, uzdıru minem östä ide. Balalarnıñ käeflären çarada katnaşularınnan uk toep bula. Smena alarga bik oşagan bulırga tieş. Kunaklar da balalar belän soklanıp kittelär. Bar territoriyagä tatar muzıkası agıla, balalar tatarça söyläşä, bii, uynıy-kölä... Ber süz belän äytkändä, şatlık börkelep tora. Härberegezgä dä tormışta üz yulın taba aluın teläp kalam! Üsep buyga citkäç «Bolgar-Tugan tel»ne iskä töşerep elmaep kuyarlık bulsın!» – di Rüzäl abıy Äxmädiew.  

«850 bala, kunaklar, oeştıru komitetı, Spass rayonı administratsiyase, TRnıñ mägarif häm fän ministrlıgı! Barıbız bergä şuşı matur smenaga öleşebezne kerttek! Komandaga xezmätläre öçen räxmät! Balalar, sezgä dä uñışlar gına teläp kalam. Ukıgız, elmaegız, yaşägez! «Bolgar-Tugan tel 2018»gä kilergä onıtmagız!» – di alannıñ başkarma direktorı Regina Nurullina.

Alinä Sısoewa, smenanıñ media-üzäge