Sälkipuşlar teatr sängaten töşenä ← kire kaytirga

Sälät berläşmäse balalarga tatar häm çit tellärne öyrätüne, yaña belemnär birüne, sport häm icatka kızıksınu uyatunı maksat itep kuya. Sälätlelär cırlıylar, şigırlär icat itälär, äle küptän tügel genä teatr sängate belän şögıllänü mömkinçelege dä tudı. Älege däreslär «Bäläkäç» studiyasenä yörüçe iñ keçkenä Sälätlelärneñ sälätlären açarga yardäm itär dip ışanıp kalabız. Bu eştä alarga Albina Sadriewa yardäm itäçäk. 

- Albina, ni säbäple ukıtuçı bulırga uyladıñ? 

- Balaçagımda teatr tügärägenä yördem, sport belän dä şögılländem, KWN da uynadım. Geologiya fakultetına ukırga kerdem, anda da KWNnı taşlamadım: UNIKS säxnäsendä gel uynıy idek. Min katnaşmagan Studentlar yazı, Berençe kurska ukırga kerüçelär kiçäläre siräk bulgandır. Olırak kurslarda üzemne stsenarist häm rejisser rolendä sınıy başladım. Şuşı mine teatr sängaten yaratırga mäcbür itkänder dä. Uniwersitetnı tämamlagannan soñ akterlık ostalıgın ukıtırga karar kıldım. Balalar belän eşläü täcribäse bar ide. 

- Sälät berläşmäseneñ nindi proektlarında katnaştıñ? 

- 2008-nçe eldan Sälättä min. «Sälät-Bögelmä» alanı sälkeşe – bu alannan ber dä aerılmadım. Annarı äydaman, ölkän äydaman buldım, xäzer direktor wazifasın başkaraçakmın. «Sälät-Şäxes», «Sälät-Arşan» smenaların da bik yarattım. Berläşmäbezneñ 15 ellıgın bilgeläp ütkändä dä üz öleşmne kerttem.

- Teatral yunäleş buldıru ideyase kemneke? 

- Älege ideya liderıbız Timur Söläymanownıkı. Cıelışlarnıñ bersendä ul hämmäbezneñ ni belän kızıksınganı xakında soraştı. Şunda min balalarga belem biräm dip cawap kaytargaç, şuşı ideya barlıkka kilde. 

- Nik «Bäläkäç» proektın sayladıñ? 

- Üz wakıtında «Bäläkäç»kä yörü mömkinlegem bulsa, minnän dä bäxetlese bulmas ide. Sälät – olı keşelär öçen dä tılsımlı dönya, balalar öçen bu bötenläy äkiyat. Sälättä mömkinleklär bixisap, monda tärbiyalänüçe balalar monı belälär, kaderlilär. Minem başka lagerlärdä dä eşläp karaganım buldı: andagı balalar sälkeşlärdän nık aerıla. 

- Niçek uylıysıñ: sineñ yunäleşeñdä uñışka ireşü öçen sälät kiräkme, ällä tırışlıkmı? 

- Ikese dä. Sälät belän genä erak kitep bulmıy, ozın-ozak wakıtlar şögıllänergä, üz östeñdä eşlärgä kiräk. Kem öçender bilgele ber rol bik ciñel, ä kemgäder, kiresençä, bik awır toelırga mömkin. Iñ möhime – näticäse yaxşı buluı bit äle. Miña kalsa, här eştä dä tırışlık bulsa tieşle näticägä ireşep bula. 

- Teatral programmagız turında söylä äle. 

- Däreslärdä artikulyatsiya, diktsiya, fantaziya üssen, igtibarlılık artsın, xäter yaxşırsın öçen maxsus künegülär eşlibez. Keçkenä balalarnıñ igtibarın alu bik awır eş, çönki alar tirä-yundäge bar äybergä dä soklanıp-öyränep karıylar. Komandaga berläşü, eçke sälätne açuga yunälderelgän däreslär dä bulaçak. Balalar öçen bu bik möhim. Annarı teatral etyudlar, ozın bulmagan küreneşlär kuya başlarbız. Däreslär uen formatında ütäçäk. 

- Maxsus kunaklar çakıraçaksızmı? 

- Äye. Alar Sälättän genä tügel, ä başka oeşmalardan da bulaçak. Iñ möhime şäxesneñ üz eşeneñ ostası buluı. Balalar belän eşläü ölkäsendä täcribäse zur bulgannar belän xezmättäşlek itäçäkbez. 

- Sälätlelärgä teläkläreñ? 

- Üsüegezne teläp kalam! «Bäläkäç» klubınıñ zur uñışlarga ireşüenä çın küñeldän ışanam.