Üseş wektorın üzgärtäbez ← kire kaytirga
Yazgı kanikul wakıtında M.I.Mäxmütow isemendäge «Fänsar» mäktäbe ukuçıları Bilärdä uzuçı yazgı sessiyadä bulıp kayttılar. Biredä Tatarstan Respublikası rayonnarınnan, çit töbäklärdän kilgän sälätle balalar katnaştı. Alar fewral-mart aralıgında, fansar.selet.biz saytında uzuçı saylap alu turın – distantsion etapnı ütep kildelär.
«Uñışlı keşe här eştä dä belemenä tayana. Şuña da bez biredä. Kanikullarıgıznı bergä küñelle itep ütkäregez!» – dip citkerde räsmi açılu tantanasında «Sälät» fondınıñ başkarma direktorı Timur Söläymanow.
Uku-ukıtu protsessı berniçä yunäleş buença alıp barıla: matematika, fizika, ädäbiyat, cämgıyat beleme, ximiya häm biologiya. Yaşüsmerlär saylap algan fännärenä könenä 4 sägat wakıtların birälär. Sessiyaneñ axırında här ukuçı tuplagan beleme buença fänni proekt yaza, anı fikerdäşlärenä dä täkdim itä.
Yakın kiläçäktä «Fänsar»da zur üzgäreşlär kötelä: tematik sessiyalär Tatarstan Respublikasınıñ aerım rayonnırında da ütäçäk ikän. «Bez alga taba üseşebezne häm uñışıbıznı kaygırtabız», – dip belderde «Fänsar» mäktäbe citäkçese Elina Nasibullina.
«Sessiyalär – alar härwakıt bik kızıklı uza. Uniwersitetnıkınnan kala, älbättä. (Kölä) Bu sessiya dä bik küñelle uzdı. Urtak şämçektä «Fänsar» turında fiker alıştık. Monda xikmät töp añlatmanı citkerüdä tügel, ä üzeñneñ xis-kiçereşläreñ belän urtaklaşuda ide. Şunı añladım: biredäge här bala öçen «Fänsar» bik kaderle häm yakın. Min üzem dä balaçagımda sessiyalärgä 6 tapkır kildem. Häm härwakıt «Bu minem iñ şäp kanikullarım!» - dip kaytıp kitä idem. Xäzer inde min äydaman. Berär sälkeşemne ozak kürmi toram da, yañadan küreşkäç anıñ küpkä olıgayganın sizäm. Üzem dä şundıy uk bulganımnı xäzer añlıym. Proekt üsä, tagın da zurrak ürlärgä ireşüenä şigem yuk. Niçek kenä üzgärsä dä, asılı yugalmasın ide», – dip xis-kiçereşläre belän Rimma Gıyläcewa urtaklaştı.
Sälkeş Albina Miñnebaewa da üz fikerlären citkerde: «Berençe tapkır sessiyagä bıltır kilgän idem. Şunnan soñ ber dä kaldırganım yuk. «Fänsar» moxite belän üzenä tarta. Biredä sin belem genä tuplap kalmıysın, yakın duslar da tabasıñ. Aralaşıp tuya almıybız!»
Şäxsän minem – Sälät media-mäktäbe ukuçısı Cämilä Fätxullina öçen – «Fänsar» mäktäbe sessiyase tormışımdagı zur wakıygalarnıñ berse bulıp tora. Bu mäktäpneñ kiläçägem öçen ez salganın yaxşı añlıym. Biredä üz eşeneñ ostaları belän aralaşasıñ, bu – zur täcribä. Min iptäşem belän matematika fänennän proekt äzerlädem. Barıbız öçen dä konferentsiya uñışlı ütte dip sanıym, ä iñ möhime – bez kurıkmıyça çıgış yasıy aldık. Bu zur batırlık sorıy.
Smenanıñ bar räxätlegen üzeñ barıp karamıyça torıp añlap beterep bulmıy. Äydamannarıbızga, oeştıruçılarga, «Fänsar» mäktäbenä zur räxmät! Sez bezne berläşterdegez! Bu – bäxet!