Sälkeşlärgä iñ yaxşı spikerlar belem birä ← kire kaytirga

SELET BILER FORUM-da uku-ukıtu programması däwam itä. Sälkeşlärgä törle yaktan üzlären açarga häm tabarga üz ölkälärendä zur uñışlarga ireşkän spikerlar yardäm itä. Tatarstan Respublikası Fännär Akademiyaseneñ Urta gasırlar arxeologiya Institutı bülek mödire Zöfär äfände Şakirow sälkeşlärgä arxeologiya fäne tiräsendä cıelgan uydırmalar xakında söyläde. «Çınlıkta, bez bu tormışta arxeologiya belän adım saen oçraşabız, bez sezneñ belän yörgän şuşı urınnar da üzlärendä küpme baylık tuplaganlıgın küz aldına da kiterä almıybız. Izge çişmäneñ, mäsälän, 5000 eldan artık tarixı bar», – dide ul. Üzeneñ şögılen spiker katlı-katlı, böten keşene kızıktıra torgan tort belän çagıştırdı, ä tabıldıklarnı – şul tortnıñ ciläkläre belän.

Sälät «WikiMäktäbe» citäkçese Timerxan Şäyxetdinow isä sälkeşlärne tatar Wikipediyase eşçänlege belän tanıştırdı. Ostaxanä barışında spiker sälkeşlärgä Wikipediya kilep çıgışına, eşçänlegenä, töp printsiplarına kagılışlı teoretik mäglümat birsä, soñınnan sälkeşlär üzläre täkdim itelgän material buença Wikipediya taläplärenä turı kilerlek bitlären buldırdılar. Soñınnan analiz häm näticälär yasaldı. Kazan Federal Uniwersitetınıñ xalıkara mönäsäbätlär, tarix häm könçıgışnı öyränü institutı dotsentı Äskär Gatin «Bezneñ mädäniyatebez, yaisä borıñgı Sabantuynı torgızırga kiräkme?» digän temaga lektsiya söyläde. Ul sälkeşlärne Bilär tarixı, tatar xalkınıñ häm başka xalıklarnıñ borıngı bäyrämnäre belän tanıştırdı. Ä ikençe çatırda isä, balalar biologiya fännäre kandidatı häm dotsent Dmitriy Şakircanow belän östäl uennarı turında söyläştelär, üzläre östäl uennarı uylap tabıp, üzläreneñ uen proektların täkdim ittelär.

Robots can dream kompaniyase citäkçese, yaş biznesmen Bulat Ganiew fikerläü, döres mäglümat tuplau, kiläçäktä kiräk bulaçak hönärlärne üzläşterü buença üz kiñäşlären birde: «Bügenge köndä diplomlı bulu möhim tügel. Ul barı tik formallek kenä. Şäxsän min üz kompaniyamä eşkä keşe alganda, äñgämä ütärgä kilgäç, berkayçan da diplom soramıym. Çönki keşe nikadär belemle bulıp ta, belemen kullana belmäskä mömkin. Iñ möhime: üzeñä kiräkle faydalı mäglümatnı ala belü, algan mäglümatnı eşkärtü häm tuplau, döres itep kullanu», – dide ul.

Kazan Federal Uniwersitetınıñ Idarä, Iktisad häm Finanslar institutı dotsentı Läysän apa Arsentewa hönär saylau, üz yulıñnı tabu, kiläçäktä kem bulırga telägäneñne niçek añlarga ikänen öyrätte: «Sez unikal bulırga, böten ölkädä spetsialist bulırga tieş. Üzegezdä nindi kompetentsiyalärne üsterergä kirägen belü bik möhim».

Intellektual uennar turında «Närsä? Kayda? Kayçan?» uenı znatoklarınıñ iñ yaş kapitanı Boris Belozerow söyläde. Boris Belozerow intellektual uennar fanatı: «Min gomer bue uynadım. 6 yaşemdä «Samıy umnıy» tapşıruında katnaştım. Bu minem berençe telewizion uenım ide. Ul wakıtta indiwidual uençı idem. Annarı komanda belän katnaşa başladım. Intellektual uennarda katnaşu bik nık äzerlekne taläp itä. Minem könem kitaplar ukıp ütä ide. Irtän torasıñ, irtänge aş aşagaç, kitap ukırga utırasıñ. Töşke aş aşıysıñ, beraz hawa sulap keräseñ, annarı tagın kitaplar», – dip söyläde ul.