«Sämrux-2018» tämam! ← kire kaytirga

Kiçä, 26-nçı fewral könne G. Tukay isemendäge Tatar Däülät Filarmoniyasendä (Kazan şähäre, Pawlyuxin ur.,73) «Sämrux-2018» el premiyaseneñ büläkläü tantanası uzdı.

Bıel premiyadä katnaşuçılar sanı - 700. Bu isemlekkä «Sämrux-2018» premiyaseneñ saylap alu etaplarında katnaşuçılar häm alarnıñ äti-äniläre, Sälätneñ profille smenalarında katnaşuçılar häm oeştıruçılar, şulay uk möxtäräm kunaklar kerä.

Katnaşuçılarnıñ geografiyase: Tatarstannıñ Zäy, Yaşel Üzän, Bögelmä, Aksubay, Tukay, Saba, Aznakay rayonnarı, Kazan şähäre, Samara ölkäse, Başkortstan Respublikası.

Tantanada RF Däülät Duması deputatı, Sälätneñ popeçitellär fondı räise Marat Bariew; Tatarstan Respublikası Premer-ministrı urınbasarı, mägarif häm fän ministrı Rafis Borhanow; Tatarstan Respublikası Premer-ministrı urınbasarı Läylä Fazlıewa, Tatarstan Respublikası Yaşlär eşläre ministrı Damir Fättaxow; Tatarstannıñ xalık yazuçısı, TASSRnıñ atkazangan sängat eşleklese Rabit Batulla häm başkalar çıgış yasadı.

Premer-ministrı urınbasarı, mägarif häm fän ministrı Rafis Borhanow «Sämrux» katnaşuçılarına häm kilgän kunaklarga Tatarstan Prezidentı Röstäm Miñnexanownıñ sälamen citkerde. «Sez – bezneñ terägebez häm tayanıçıbız, bez sezgä bik zur ömetlär baglıybız», – dip möräcägat itte ul «sälät»lelärgä.

Tatarstan Respublikası Premer-ministrı urınbasarı Läylä Fazlıewa: «Sezneñ bik zur baylıgıgız – tugan telegez bar. Sez üz xalkıgıznıñ mädäniyaten kaderläp saklıysız. Monıñ öçen sezgä bik zur räxmät. Tagın ber bik yaxşı sıyfatıgız bar – komandada eşli häm ber-beregezgä teräk bula beläsez», – dip bilgeläp ütte.

Bügenge köndä Sälät böten respublikadan häm Rossiya töbäklärennän distälägän meñ sälätle bala häm talantlı yaşlär öçen çın mömkinleklär mäydanı bulıp tora, dip sanıy Damir Fättaxow.   

«25 ellık tarixı däwamında Sälät yaşlär xäräkätennän, sälätle balalarnı häm talantlı pedagoglarnı tuplap, cämgıyatne sälamätländerüneñ tulı ber texnologiyasenä äwerelde», - dip bilgeläp ütte ministr.

Bıel Premiya 8 nominatsiyadä tapşırıldı:

- «El sälkeşe» nominatsiyase;

- «El äydamanı» nominatsiyase;

- «El ölkän äydamanı» nominatsiyase;

- «El direktorı» nominatsiyase;

- «El alanı» nominatsiyase;

- «El kuldaşları» nominatsiyase;

- «El klubı» nominatsiyase;

- «Sälät cırlıy» nominatsiyase.

Premiyaneñ konkurs etapları üz eçenä şäxsi häm komanda kazanışları portfoliosın formalaştıru, ekspert sowetı ägzaları belän äñgämä häm intellektual wiktorinanı aldı. «El kuldaşları» nominatsiyasendä şulay uk östämä konkurs etabı uzdı – pedagogik situatsiyalärne xäl itü, anıñ kısalarında äydamannar katlaulı situatsiyalärdä balalar belän eşläü künekmälären kürsättelär.

Premiyaneñ üzençälege - ciñüçelär öçen maxsus büläkläü fondın berläşmä katnaşuçıları tarafınnan formalaştıru. Iñ-iñnärgä akçalata büläk tuplau öçen, fund.selet.biz fondı buldırılgan ide. Bitaraf bulmagan keşelär yardäme belän anda 150 meñ sumnan kübräk akça cıeldı. Bu akça ciñüçelärgä bülep bireläçäk.

«Sämrux-2018» el premiyase ciñüçeläre:
           
- «El äydamanı» - Zärina Xalilowa, 20 yaş (Alekseewsk rayonı);
- «El ölkän äydamanı» – Güzäl Äxmätcanowa, 21 yaş (Kazan); 
- «El direktorı» - Bulat Gäynetdinow, 24 yaş (Kazan); 
- «El kuldaşları» - Azat Bulatow, Alinä Näbiullina («Sälät – Eşmäkär» alanı);
- «El klubı» - «Sälät Aksubay klubı» (Klub räise – Läylä Moratşina.

«Aksubaynıñ 3-nçe urta gomumi belem birü mäktäbe»);
- «El sälkeşe» – Ence Äxmätcanowa, 16 yaş (Kazan);
- «El alanı» - «Sälät – Samara» (Samara);
- «Sälät cırlıy» - «Sälät - Aznakay» (Süzlär awtorı: Batır Xarisow. Köy awtorı: Möxämmäd Zinnätullin. Başkaruçılar: Batır Xarisow, Elena Koşelewa);
- «El partnerı» - «Tübätäy» berençe tatar xäläl tiz tuklanu çeltäre häm PAO «Ak Bars Bank»;
- «Sälät stipendiyase - Ilyas Zäynullin, Aygöl Wäliullina, Timur Nazarow häm Bulat Wäliullin.