XVIII Respublikaküläm Sälät «Əydamannar mäktäbe» tämam ← kire kaytirga
25-30-nçı gıynwar aralıgında, «Baytik» sälamätländerü üzägendä (Biektau rayonı, Krutuşka bistäse) XVIII Respublikaküläm Sälät «Əydamannar mäktäbe» uzdı. Çara Tatarstan Respublikasınıñ fän häm mägarif ministrlıgı; yaşlär eşläre ministrlıgı häm Tatarstan Respublikasınıñ ictimagıy «Sälät» yaşlär fondı belän berlektä ütkärelä.
«Äydamannar mäktäbe» «Sälät»neñ cäyge proektları häm forumnarı öçen äydamannar komandası tuplau öçen oeştırıla. Mäktäptä 150-gä yakın keşe katnaştı. Alar arasında ütkän ellardagı katnaşuçılar da, äle küptän tügel genä Sälät Yortında yaş äydamannar öçen maxsus kurs ütkännäre dä bar ide.
Uku-ukıtu programması kısalarında äydamanlıkka iya bulırga tieşle sıyfatlar açıklandı: çın äydaman psixolog ta, orator, oeştıruçı, ukıtuçı da bula belergä tieş.
Äydamannar – «Sälät» berläşmäseneñ cäyge proektlarında töp rolne uynauçı keşelär bulıp tora. Smena barışında alar barlık cäyge alannar belän dä yakınnan tanıştı, biredä «Sälät 2019» forumınıñ kontseptsiyalären buldırdı, härberseneñ komandadagı urını, totkan role, burıçları bilgelände. Şulay uk ber atna eçendä alar sport, uku-ukıtu, tärbiya birü çaralarınıñ programmaların tözü belän dä mäşgul buldı.
Cäyge alannarda äydaman bulıp katnaşuçı yaşlär öçen ukıtu programmasın üz eçenä aluçı 5 könlek intensiw üzeneñ barlık maksatların da ütäde dip äytergä mömkin. Katnaşuçılar Sälät tarixı belän tanıştılar, alannarda eşläü üzençäleklärenä töşendelär. Mäktäptä bulgan 135 studentnıñ 80%ı - kiçäge sälkeşlär, yagni äle uzgan cäyne genä Sälät alannarında yal itkän yaşlär. Alar öçen «Äydamannar mäktäbe» - yañä däräcä, sınau häm, älbättä, Sälät moxitendä üsü mömkinlege.
«Äydamannar mäktäbe»neñ uku-ukıtu programması üz eçenä küp törle yunäleşlärne ala. Könenä 8 sägat eçendä studentlar balalar belän eşläü üzençäleklären, pedagogik häm psixologik oçraklarnı döres çişü, şämçeklärne, däreslärne, ostaxanälärne ütkärü seren öyrändelär. Älege temalarda alarga başcitäklär (2019-nçı elnıñ cäendä Sälät alannarında direktor häm ölkän äydaman buluçılar) häm çakırılgan ukıtuçılar yardäm ittelär.
«Äydamannar balalar belän eşlärgä äzer!» - dip äytü öçen tagın berniçä möhim etapnı uzası kaldı. Ul da bulsa Sälät Yortında mart-aprel aylarında uzdırılaçak däreslär, medosmotr häm başka administratiw soraular. Gomumän alganda, härber katnaşuçıda äydaman başlangıçı bar, häm bu bezne nık söenderä. Bu elgı cäy, kim digändä, uzgan cäy sıman atmosferalı häm cılı bulır dip ışanıp kalabız. Äydamannar, hiçşiksez älege maksatnı ütäü öçen barısın da eşlärgä äzer.
Iyun-awgust aylarında ütüçe Sälät Bilär forumı smenalarına äydamannar tuplau maksatı belän, mart-aprel aylarında «Äydamannar mäktäbe»neñ tagın ber küçmä sessiyase bulır dip kötelä. Yazga taba bu planga tögällek kerer dip uylıybız», dip fikeren belderde «Äydamannar mäktäbe» koordinatorı Igor Smirnow.