«Ostalar bistäse» 80 kreatiw injener äzerläde ← kire kaytirga

Bilärdäge «Fänsar» fän häm mägarif üzägendä Sälät berläşmäseneñ «Ostalar bistäse» alanı tämamlandı. Älege smena üzenä altın kullı balalarnı cıya, maksat itep şäxes üsterü, belem aluga şartlar tudıru, hönäri yunäleş birüne ala.

Bıel alan «Uniwersitet talantow» häm KNITU-KAI injeneriya litsee belän berlektä uzdırıldı.

Smenada 9-17 yaş aralıgındagı 80 bala katnaştı. Alar arasında Tatarstan yaşläre genä tügel, Başkortostan, Samara häm Krasnodar ölkälärennän ük kilgän katnaşuçılar da bar. Küplär Sälät proektlarında berençe tapkır gına katnaşa ikän, barısı da smenadan kanägat kaluların belderdelär.

Uku-ukıtu könlek programmanıñ 5 sägaten bili. Balalar törle yunäleşlär buença 4 törkemgä bülenä: «Robototexnika», «Elektronika häm programmalaştıru nigezläre», «Başlangıç texnik modelläşterü» häm «Lazerlı texnologiyalär». Biredä alar injeneriya turında teoretik belem tuplap kına kalmıyça, zamança cihazlarda (lazerlı stanok, plotter) eşläp tä karıy aldılar. 18 kön eçendä härkem üz planerın yasadı, köymälär citeşterde, pnewmo-gidrawlik raketa, tönge yaktırtkıçlar ämälläde. Iñ äybät eşlär «Ostalar Bistäse»neñ kürgäzmäsendä urın aldı, älege çara – smenanıñ kulminatsion noktası bit.

Kürgäzmädä «Sälät» Fondınıñ başkarma direktorı Timur Söläymanow, «Sälät» yaşlär üzäge direktorı Aygöl Gabdraxmanwowa häm KNITU-KAI injeneriya litseenıñ direktorı Dinar Gabidullin da katnaştı. Kunaklar sälätle yaşlärneñ eşlären yugarı bäyalädelär, xezmättäşlek turında da söyläştelär.

Aliya Wäliewa, smenanıñ direktorı:

- Balalar bäxetle häm şat. Dimäk, alar äybät yal itkännär. Bu bezneñ öçen iñ möhime. Däreslärdän kala intellektual häm sport uennarı da ütkärdek, KWN uynadık, «Aulak öy»gä cıeldık. Berkemneñ dä äydamannarınnan aerılıp öygä kaytası kilmäde. Komandabız belän berlektä şundıy smena oeştıra alganıbızga bik şatmın. Balalar küp närsägä öyrändelär, küzallauların kiñäyttelär.

Artur Äminow, katnaşuçı:

- Sälättä min berençe tapkır. Tatarstanda tudım, tik inde 3 el Krasnodar ölkäsendä yaşim. Smena bik şäp ütte! Däreslär oşadı, bez alarda CorelDraw, Scratch, Arduino programmalarında eşlädek. Här könne törkemnärgä maxsus biremnär birelä ide. Tagın kiläm äle.

Ilnar Şabanow, katnaşuçı:

- Min Sızrannan. Sälät turında ätiem belän şähärebezneñ Milli-mädäni tatar awtonomiyasendä işettek. Anıñ citäkçese Rinad Şäräfetdinow bezgä şuşı alanga barırga kiñäş birde. Bik zur räxmät aña! Smena oşadı. Räxmät!