«Änwär Xäyri ukuları»na gariza birü 28-nçe noyabrgä kadär ozınaytıldı ← kire kaytirga
Igtibar!
«Änwär Xäyri ukuları» Respublikaküläm yaşlär fänni-gamäli konferentsiyasenä gariza kabul itü kampaniyase 28-nçe noyabrgä kadär ozınaytıldı.
«Änwär Xäyri ukuları» Respublikaküläm yaşlär fänni-gamäli konferentsiyase «Sälät» Tatarstan Respublikasınıñ yaşlär ictimagıy fondı, «Sälät» yaşlär üzäge Däülät uçrejdeniese yardäme belän, Tatarstan Respublikası fännär akademiyase, Tatarstan Respublikası mädäniyat ministrlıgı, Tatarstan Respublikasınıñ yaşlär eşläre häm sport ministrlıgı belän berlektä, Tatarstan Respublikası milli kitapxanäse, Ş.Märcäni isemendäge tarix institutı, Tatarstan Respublikası FA arxiologiya institutı , KFU xalıkara mönäsäbätlär, tarix häm könçıgış tellär institutı, Alekseewsk munitsipal rayonı administratsiyase, Aksubay munitsipal rayonı administratsiyase katnaşında uzdırıla.
Bügenge köndä konferentsiyagä 25-tän artık gariza kabul itelde, ni kuanıç, «Min yaratam sine, ilem» yunäleşendä eşlär kübräk. Konferentsiyadä härkem katnaşa ala. Fänni ölkädä üzegezneñ sälätegezne açar öçen bu menä digän mömkinçelek.
Konferentsiyadä tarixçı, TR Fännär akademiyaseneñ ägza-korrespondentı, tarix fännäre doktorı Fayaz Xucin; Bilär däülät tarixi-arxeologik häm tabigıy muzey-tıyulıgı direktorı Änäs Kutuew Bilär tarixı belän yakınrak tanıştıraçaklar.
Möxtäräm kunaklar arasında Änwär aganıñ tormış iptäşe Almira xanım, ulı Aydar Xäyri, Fännär akademiyase akademigı, Sälät ostazı Indus Tahirow, TR Alekseewsk rayonı başlıgı Wladimir Kozonkow, Alekseewsk rayonı başkarma komitetı räise urınbasarı Nikolay Çurin, TR atkazangan fän belgeçe Färit Soltanow, TR milli muzey citäkçese Gölçäçäk Näcipowa, dotsent, tarix fännäre kandidatı Zöfär Şakirow ta bar.
Ike kön däwamında uzaçak ukularda katnaşuçılarnıñ fänni eşlären tıñlau, analizlau, şulay uk kızıklı kiçke çaralar, yaña formatta ädäbi kiçä uzdıru da küzdä totıla. Kiçke çaranıñ kunakları – Sälät weterannarı şagıyrä Yoldız Minnullina häm Sömbel Gaffarowa.
Konferentsiyaneñ maksatı:
– Bilär kalası tarixın öyrängän, tatar dönyası tarixında zur ez kaldırgan galim Änwär Xäyri isemen mäñgeläşterü;
- ukuçılarda fänni, ictimagıy eşçänlek alıp bargan galimneñ fänni-praktik eşlären ukuçılarda kızıksınu uyattıru;
- yaşlärdä häm mäktäp ukuçılarında tarixi-arxiologik ölkägä kagılışlı fänni eşlärendä yardäm itü.
Konferentsiya tübändäge yunäleşlär buença uzdırıla:
«Bilär kalası. Tarix: bügen häm kiläçäk».
«Änwär Xäyri mirasın öyränü».
«Min yaratam sine, ilem» (misal öçen, mäktäbem tarixı, awılım tarixı, yaşägän uram tarixı.....)
«Gailäm tarixı» (misal öçen, minem şäcäräm, gailäm belän bäyle bulgan istäleklär).
Konferentsiyadä Tatarstan Respublikasınıñ 8-11-nçe sıynıf ukuçıları häm berençe kurs studentları katnaşa ala. Fänni eşlär ber keşe tarafınnan da, kümäk eş – 3 keşe tarafınnan da eşlänä ala. Iñ möhime, fänni citäkçe belän.
Konferentsiyadä katnaşu öçen 2017-nçe elnıñ 28-nçe noyabrenä kadär monda gariza kaldırıp, fansar@selet.biz elektron adresına fänni-tikşerenü eşeneñ tezisların cibärergä kiräk ( härber kägaz bite aerım fayl bularak berketelergä häm awtorlarnıñ familiyaläre kürsätelergä tieş).