Färidä Gazizullina häm Bulat Gaynetdinow – iñ şäp kuldaşlar ← kire kaytirga

«Sämrux-2017» el premiyase – Sälät oeşması öçen bik möhim häm ähämiyatle çaralarnıñ berse. Bu elnı yaña «El kuldaşları» nominatsiyasendä ciñüçelär isemenä Färidä Gazizullina häm Bulat Gaynetdinow iya buldılar. Kotlıybız! Bügen, sezgä Färidä belän äñgämäne täkdim itäbez.

Sineñ öçen Sälät ul – …

- Minem öçen ul – şaktıy küp kızıklı şäxeslär bulgan urın. Biredä härber keşe ilhamlandıra. Sälät ul – şäxsi yaktan üser öçen, çın duslarnı tabır öçen menä digän urın!

Sälättä närsä belän şögıllänäseñ?

- Xäzerge wakıtta bez barıbız da aktiw räweştä cäyge smenalarga ezerlänü eşçänlegen alıp barabız. Bu cäyne «Sälät-Yar Çallı»ga häm «Sälät-Şäxes»kä äydaman bulıp barırmın dip ömetlänäm.

Bezneñ oeşmadan tış, närsä belän şögıllänäseñ?

- Üzemneñ fakultetımda student tormışında «kaynıym» dip bula. Biredä, bez törledän-törle çaralarnı oeştıru, alıp baru belän şögıllänäbez. Bezneñ studentlar sowetı üzeneñ eçke atmosferası belän bik nık Sälätkä oxşagan. Ul şundıy uk gailä xislären tudıra! Şulay uk woleybol belän şögıllänergä yaratam. Küptän tügel ukuleleda uynarga öyränä başladım.

Sineñ Sälättäge töp kazanışıñ?

- Bügenge köngä Sälättä bulgan iñ zur kazanışım ul – Bulat Gaynetdinow belän bergä «Sämrux-2017» premiyaseneñ «El kuldaşları» nominatsiyasendä ciñü yaulau.

Sineñ öçen «Sämrux» ul – ...

- «Sämrux» ul – üz-üzeñä ışanu xisen buldıra torgan premiya.

«Sämrux» premiyasendä ciñer öçen nindi 3 sıyfatka iya bulırga kiräk?

- Şäxsän minemçä, ul – maksatçanlık, tırışlık häm ciñügä ışanu.

Ciñüne kötkän ideñme?

- Bolay cawap birä alam: min älege ciñüne bik telädem.

Üzeñ turında söyläp kit.

- Min 1998-nçe elnı Kukmara rayonınıñ Waxitowo awılında tudım. Xäzerge wakıtta min Kazan awiatsiya institutınıñ kompyuter texnologiyalär häm mäglümat yaklau fakultetında belem alam. Min – açık, därtle, aralaşuçan, cawaplı keşe. Üzemne tabarga xıyallanam. Mine keşelär ilhamlandırganın da äytep kitäsem kilä. Mäktäp ellarında min folklor ansamblenä yördem. Biredä biyulär, teatral postanowkalar kuyu belän şögılländek. Mäktäp sowetı eşçänlegendä dä üzemne aktiw kürsättem. Bügenge köndä küp wakıtımnı uniwersitetımnıñ studentlar sowetında ütkäräm.

Kiläse elda «Sämrux» ta katnaşuçılarga närsä telär ideñ?

- Üzegez bulıp kalırga häm üz köçläregezgä ışanırga telär idem!

«Sämrux-2017» premiyaseneñ partnerları: «Tübätäy» tatar milli tiz tuklanu çeltäre, SELETSTORE yaşlär kieme häm aksessuarlar kibete, «Besedka» icat studiyase, «Rocket Records» tawış yazdıru studiyase, G.Kamal isemendäge Tatar däülät akademiya teatrı, «Widimıy swet» foto häm wideo studiyase, FUN24 küñel açu häm «Ixsan» trening üzäge.