Äylänä-tirädäge maksatçan balalarga üz mäktäplärendä berläşmäneñ atmosferasın tarata torgan Sälät aktiwistları belän tanıştıruıbıznı däwam itäbez. Bügen bez sezne «Yaktılık» mäktäbe nigezendä eş alıp bargan «Sälät-Samara» klubınıñ räise Salawat Xälimullin belän tanıştırıp ütärbez. 

- Salawat, sin ni öçen klub räise bulırga alındıñ? 
- «Yaktılık»ta belem aluçı balalar üzläre öçen döres yul saylıy alsınnar öçen klubnıñ eşen däwam itäsem kilä. Älbättä, berençe çiratta, bu minem üzem öçen faydalı, çönki sin üzeñdä liderlık sıyfatların nıgıtırga mömkinleklär taba alasıñ. Programmanı çınga aşıru ciñellärdän tügel, tik şulay da, köçleräk häm ışanıçlırak bulır öçen, bez bu yaisä tege sınaularnı ciñärgä tieş. 

- Salawat, sineñ öçen Sälät närsä ul? 
- Sälät – ul aerım ber galaktika, koyaş isä balalarga üzläreneñ energiyalären, küñel cılısın öläşüçe äydamannar. Klub räweşendä buldırılgan planetalar şaktıy. Härber klubnıñ üz kuratorı bar, ul el däwamında eşne alıp barırga bulışa. Sälät – sälätle balalar yortı. Xätta üzlären sälätsez dip sanagan balalar biredä üzläreneñ sälätlären açalar häm başkalar kebek ük tagın da köçleräk, energiyale, intellektual bula alalar. 

- Sin Sälät berläşmäseneñ kaysı proektlarında katnaştıñ? 
- Min küp tapkır seminarlarda buldım. Bıel «Bolgar-Tugan tel» forumında, «Sälät-Samara» smenasına bardım. Bu miña üzemdä icadi, sportiw potentsial açarga yardäm itä. Min köçleräk, energiyaleräk bula başladım häm intellektual şäxes bularak üseş alam. 

- Sezneñ klub kaysı yagı belän yaşlärne kızıksındıra ala? 
- Klub keşegä üzeneñ sälätlären açarga mömkinlek birä. Min 21-nçe gasır yaşläreneñ naçar yuldan kitülären telämim. Klubka kuşılıp, keşe äkrenläp üzeneñ potentsialın aça başlıy. Ägär ul minem klubka kuşıla ikän, dimäk, anıñ üseş teläge bar, ägär teläk bar ikän, dimäk, yaxşı näticä dä bulaçak digän süz. Kilegez! Bez bik şat bulaçakbız.