«Äydämannar mäktäbe onlayn» katnaşuçıları öçen «Ukıtuçılar mäktäbe» uzdı ← kire kaytirga

Bu yallarda «Äydamannar mäktäbe onlayn» kısalarında «Ukıtuçılar mäktäbe» uzdı. Anda 110 keşe katnaştı. Alar barısı da – bıel Sälätneñ cäyge smenalarında ukıtuçı bulırga niyatläüçelär.

«Ukıtuçılar mäktäbe»ndä spikerlar bularak Sälätneñ Mägarif häm belem birü texnologiyaläre üzäge citäkçese, filologiya fännäre kandidatı, dotsent Dilärä Yakubowa häm Ingliz tele ukıtuçısı, üz metodikası awtorı, tärcemäçe, Böekbritaniyadä häm AKŞta xalıkara sertifikatsiya algan, Pekin uniwersitetlarında häm Walt Disney kompaniyasendä ingliz tele ukıtuçı Zakir Subxankulow çıgış yasadı.

Bez Dilärä Yakubowa belän söyläşep aldık. Ul «Ukıtuçılar mäktäbe» turında tulırak söyläde.

– Dilärä apa, mäktäp kemnär öçen oeştırıldı?

– Mäktäp bıel Sälätneñ cäyge smenalarına ukıtuçı bulıp baraçak yaşlär öçen oeştırıldı. Alarnıñ kübese ber ük wakıtta äydaman da, ukıtuçı da bulaçak.

– Nindi temalarnı kuzgattıgız?

– Iñ möhim tema – cäyge smenalarga äzerlek turında söyläştek. Sälät dönyası belän, anıñ belem birü kontseptsiyase nigezläre belän tanış bulırga kiräk didek. Sälätneñ belem birü sisteması şäxesne törle yaklap üsterügä nigezlängän. Alannıñ kontseptsiyase belän tanış bulırga, kemne ukıtasıñnı belep torırga kiräk ikänen añlattım. Aerım alganda törle yaş kategoriyalärenä belem birü turında söyläştek. Belem birü programmasın tözü turında da süz buldı. Şulay uk maksat häm burıçlarnı neçek formalaştırırla, näticäne niçek planlaştırırga, nindi däres formatları bula, nindi motiwatsiya alımnarı – barısın da karadık. Moxit tudıru turında da söyläştek. Moxit şulay uk şäxes üseşe öçen bik möhim. Yaxşı ukıtuçı nindi sıyfatlarga iya bulırga tieşlegen dä açıkladık. Häm, älbättä inde, ike eşne bergä alıp baru üzençälekläre turında aralaştık.

Ä Zakir abıy çit tellärne ukıtu metodikaları turında söyläde.

– Küpçelek äydamannar ukıtuçı da bulıp eşli, didegez. Alarnıñ kübese beleme buença pedagog tügel. Bu plyusmı, ällä minusmı?

– Sälättä professional ukıtuçılar gına ukıtmawı plyus. Berençedän, bezneñ äydamannar «Äydamannar mäktäben» ütä. Bu – el däwamında bara torgan intensiw eş, yagni alar üzenä kürä ber ukıtuçılar mäktäben ütä disäñ dä bula, ukıtuçı bulıp eşlärgä äzerlekle bula. Ikençedän, äydamannar – yaşlär, studentlar, magistrantlar, alar entuziazm belän tulı, alarnı öyrätep bula häm bik teläp öyränälär. Alarnıñ yaşläre buença balalarga yakın buluı da äybät. Bu balalarda alarga karata ışanıç tudıra. Äydaman-ukıtuçı bala öçen ürnäk bula. Tırışıp ukısam, min dä yakın kiläçäktä şundıy bula alaçakmın, dip uylıy sälkeş.

– Sälätneñ Mägarif häm belem birü texnologiyaläre üzägeneñ yakın kiläçäkkä plannarı?

– Berençedän, xäzer bu ukıtuçılar üzläreneñ plannarın äzerläp, bezneñ metodistlarga cibäräçäk, bergäläp eşläp beterep, anı tormışka aşıraçak. Älbättä inde, üsärgä telibez. Yaş ukıtuçılar äzerläü öçen mäktäp eşlärgä uylıybız.

– Sälät ukıtuçıları aldında nindi burıçlar tora soñ?

– Sälät ul – belem birü moxite. Äytkänemçä, bez şäxesne törle yaklap üsterä torgan moxit buldırırga tırışabız. Häm pedagognıñ burıçı – şundıy şäxeslär tärbiyaläügä üz öleşen kertü, alarga yunäleş kürsätü, äytep cibärü, motiwatsiya birü häm häryaklap üsterü.