«Sälät» forumı katnaşuçılarına gomerlek hönärlären saylarga yardäm itä ← kire kaytirga

Forumnıñ berençe smenası inde artta kaldı, ämma istälekläre haman da cannı cılıta. Katnaşuçılar öçen bik bay programma äzerlängän. Barı tik uku-ukıtu programması kısalarında gına berençe smenada 114 sessiya uzdı - bu lektsiyalär, ostaxanälär, däreslär. Alar barısı da zamança hönärlärgä bagışlangan, anda belgeçlär üz täcribäläre belän urtaklaşa häm balalarga tormış hönärlären saylarga yardäm itä.

Spiker häm anıñ eşçänlege belän ilhamlanıp, üz hönären saylagan häm yugarı uku yortına kergän katnaşuçılar da bar.

«Tatar radiosı» radiostantsiyase («Sälät» forumınıñ partnerı) didjee häm «Yalkın» jurnalı xäbärçese Ilüzä Kasıymowa da şundıylar rätennän. 2018 elda ul forumga katnaşuçı sıyfatında kilgän. 2022 elda inde üze forum katnaşuçılarına eş täcribäsen söyläde.

Ilüzä, Sälät dönyası belän niçek tanışuıñ turında söylä.

Min forumga berençe tapkır 2018 elda kildem, miña ul wakıtta 18 yaş ide. Min ber festiwaldä berençe urın aldım häm büläk sıyfatında mine «Sälät» forumına cibärdelär. Başta min şiklänep tordım, tik annarı barırga kiräk digän kararga kildem. Östäwenä, bu min katnaşuçı sıyfatında bara algan soñgı el ide.

Forumga kilgäç, berençe täesirläreñ nindi ide?

Kilep töşkäç, min kayda buluımnı, gomumän, añlamadım. Läkin tora-bara töşenä, iyaläşä başladım. Miña «Tatar radiosı» alıp baruçı Nazlıgöl Söngatowanıñ ostaxanäse aeruça nık yogıntı yasadı, anda ul radiotapşırular alıp baruçı hönäre turında söyläde. Ul niçek, döres itep, efirlar alıp barırga, niçek häm närsä söylärgä kiräklegen añlattı. Annarı bez üzebez efir öçen tekst yazıp karadık, anı ukıdık, ä ul bezneñ xatalarnı tözätte, bezne döres itep ukırga öyrätte.

Äle dä xäteremdä, ul wakıtta min ostaxanä häm spiker belän şundıy ilhamlandım ki, xätta forumnan soñ radio alıp baruçısı häm jurnalist bulu öçen jurfakka kerergä karar kıldım. Xäzer bez Nazlıgöl belän bergä radiostantsiyadä eşlibez.

Bu sineñ balaçak xıyalıñ ideme?

Yuk, balaçakta min kibettä satarga yaki äniem häm äbiem ezläre buença ukıtuçı bulırga xıyallana idem. Ämma radio bezneñ gailäneñ möhim ber öleşe ide. Mäsälän, äniem belän aşarga äzerlägändä, bez härwakıt radio, şul isäptän «Tatar Radiosı»n da kabıza idek. Bez anı tıñlagan çakta: «Minem dä efirda yañgırıysım kilä», - dip uylıy idem.

Sineñ balaçakta radionı eçtän kürgäneñ, studiyadä bulganıñ bar ideme?

16 yaşemdä äniem mine Arçada urnaşkan «Nur» balalar teleradiostudiyasenä alıp bardı. Baştan miña anda uñaysız ide, tik annan iyaläştem häm miña oşadı. Annarı min xätta törle konkurslarda häm festiwallärdä katnaşa başladım häm bu yunäleştä üsärgä mömkin dip uyladım. Xäzer min äniemä şuşı yulnı kürsätkäne öçen bik räxmätlemen.

Sez xäzer Nazlıgöl belän kollegalar. Ostaxanäneñ siña niçek täesir itkänen beläme ul?

Äye, radioga eşkä urnaşkaç, min aña bu wakıyga turında söylädem. Ul mine belmi ide häm çın küñeldän gacäplände. Ämma miña üzem yulımnı tabarga yardäm itä aluına bik şatlandı.

Radioga eşlärgä kilüeñ turında söylä äle.

Bu minem berençe eş täcribäm ide. Min kastingka kildem, bez törle temalarga bik küp söyläştek, annarı tekst ukıp karadık. Şunnan soñ miña: «Bez sezgä şaltıratırbız», - didelär.

Mögaen, miña şaltıratmaslar, digän fiker belän min öygä kaytıp kittem. Läkin kaytıp citärgä ölgermädem, telefon şaltıradı häm miña: «Bügen kiç belän kilep, apparatura belän eşläp kara», - didelär. Min bik şatlandım!

Didjey öçen döres söyläşä belü genä tügel, ä apparatura belän eşläü dä bik möhim - texnik yaktan barısın da öyränergä kiräk.

Ikençe könne minem stajirowkam häm sınau wakıtım başlandı, şunnan soñ min zur kollektiwka eläktem. Berençe tapkır efirga 2021 elnıñ 30 martında çıktım.

Änieñ sineñ efirlarıñnı tıñlıymı?

Tıñlıy. Ul gına tügel, böten tugannarım da. Kaywakıt, säbäbe bulsa, tänkıytlilär dä äle. Ä nigezdä gorurlanalar gına.

Bıel sin forumga radio alıp baruçısı sıyfatında kildeñ. Niçek siña monda?

Min forumga radio alıp baruçısı sıyfatında kilüemä çiksez şatmın. ​​Uzgan el min monda şulay uk didjey sıyfatında kilgän idem. Minem forumga katnaşuçı bularak kına tügel, äydaman yaki oeştıruçı bularak kilergä dä xıyalım bar ide. Läkin min monda efirlar alıp baraçagımnı küz aldıma da kiterä almadım.

Sin şulay uk ​​katnaşuçılar öçen ostaxanä dä uzdırdıñ. Närsälär xis itäseñ?

Xislär iskitkeç. Monnan berniçä el elek şundıy uk ostaxanäne Nazlıgöl ütkärgän ide. Ul mine ilhamlandırdı, min radioga eläktem häm xäzer inde üzem balalar öçen däreslär ütkäräm. Min dä şulay uk ​​kemneder ilhamlandıra alganmındır dip bik ömetlänäm.

Kem belä, bälki 4 eldan soñ monda bügen minem ostaxanädä bulgan balalar çıgış yasar.

Ostaxanädä nilär buldı?

Min alarga üzemneñ täcribäm, jurnalist hönäre häm bügenge köndä jurnalistikanıñ role turında söylädem, diktsiyane kamilläşterü öçen artikulyatsion gimnastika kürsättem.

Annan soñ balalar küp soraular birdelär. Mäsälän, niçek jurfakka kerergä, monıñ öçen nişlärgä, efir wakıtında kötelmägän xällär kilep çıkkan oçrakta nişlärgä kiräklege turında kiñäşlär soradılar.

Berär bala aeruça iseñä kerep kaldımı?

Barlık balalar da bik kızıksınuçan ide, läkin Ämirxan isemle ber cirän çäçle malay mine gacäpländerde. Baksañ, ul bezneñ radiostantsiyane küptän tıñlıy ikän, böten programmarnı häm radiotapşırularnı yattan öyrängän. Bik küñelle buldı. Ostaxanädän soñ bez istälekkä foto yasadık.