IV Xalıkara uku-ukıtu "Sälät" yaşlär forumı: 2-nçe kön ← kire kaytirga

Bügen, yagni 8-nçe iyul – IV Xalıkara uku-ukıtu «Sälät» yaşlär forumınıñ ikençe köne. Näk tä menä bügen räsmi räweştä açılu tantanası uzdı. Älege çarada «Sälät» berläşmäsenä nigez saluçı Cäüdät abıy Söläymanow; Tatarstan Respublikası Fännär Akademiyaseneñ witse-prezidentı Wadim Xomenko; Tatarstan Respublikasınıñ Alekseewsk munitsipal rayonı başlıgı Wladimir Kozonkow; Tatarstan Respublikasınıñ atkazangan sängat eşleklese, dramaturg, publitsist Rabit Batulla; tarix fännäre kandidatı, arxeolog Fayaz Xucin; «Sälät» yaşlär üzäge direktorı Rail Kuramşin da çıgış yasadı.

«Biredä kabattan sezne kürüemä çiksez şatmın! Xuş kildegez! Duslaşıgız, belem tuplagız, yal itegez!» – dip sälamläde sälkeşlärne Cäüdät abıy Söläymanow. Alekseewsk rayonı başlıgı Wladimir Kozonkow isä «Min sezne el saen biredä karşı alırga äzermen!» – dip belderde.

Açılu tantanasınnan soñ uku-ukıtu programması üz eşçänlegen başlap cibärde. Şulay uk bügen biredä Tatarstan Respublikasınıñ 30 rayonınnan kilgän delegatsiyalär dä bar ide. Däreslär, trening, master-klasslarda sälkeşlär genä tügel, rayonnardan kilgän älege 800 bala da katnaştı. Ä selet.biz saytında isä şuşı däreslärneñ onlayn-translyatsiyalären kürergä mömkin buldı.

Könneñ ikençe yartısında xörmätle kunagıbız Tatarstan Respublikasınıñ Prezidentı Röstäm Nurgali ulı Miñnexanow ta kilde. Biredä ul «Fänsar» Akademiyaseneñ açılu tantanasında katnaştı, sälkeşlär belän aralaştı. Monda Röstäm Nurgaliewiçnıñ igtibarına yaşlär tarafınnan törle fänni proektlar da täkdim itelde.

Kiçke çara bularak alannarnı täkdim itü saylanılgan ide. Biredä här alan üzen iñ üzençälekle, iñ kreatiw häm iñ dus-tatu itep kürsätergä tırıştı.

Ä irtägä isä uku-ukıtu programmasınıñ däwamı kötelä. Iñ kaynar yañalıklarnı sez selet.biz saytında häm räsmi törkemnärdä küzätep bara alasız.