«Äydamannar mäktäbe»neñ küçmä sessiyase tämam ← kire kaytirga

Kwalifikatsiya kütärü turında tanıklıklar, ör-yaña belem häm cäygä äzerlekle 150 äydaman!  

30 nçı gıynwar – 2 nçe fewral könnärendä «Äydamannar mäktäbe»neñ küçmä sessiyase uzdı. Ul bıel berençe tapkır «Yoldızlı» bazasında ütkärelde. Sessiyagä Tatarstannıñ törle rayonnarınnan, kürşe respublika häm şähärlärennän 150 kız häm eget cıeldı. 

«Äydamannar mäktäbe» Sälätneñ cäyge alannarı häm forumnarı öçen äydamannar komandası tuplau öçen oeştırıla. Katnaşuçılar küçmä sessiyadä törle pedagogik situatsiyalärne çişü yulların öyrändelär, Sälät eşçänlege belän yakınnanrak tanışu häm kiçke çaralar ütkärü buença kızıklı lektsiyalärdä häm treninglarda katnaştılar. Bulaçak äydamannar smenaga äzerlänü tärtibe, alannarda eşläü üzençälekläre, törkem tözü etapları belän dä tanıştı.

Balalar belän uñışlı elemtä buldıru serläre belän Sälät alannarında direktor häm ölkän äydaman buluçılar, çakırılgan kunaklar urtaklaştı.  
Spikerlar arasında psixolog, biznes-trener Elwina Babaewa, Sälät proektları koordinatorı, KFUnıñ ölkän ukıtuçısı Elina Nasibullina, Filologiya fännäre kandidatı, Sälätneñ Mägarif häm uku-ukıtu texnologiyaläre üzäge citäkçese Dilärä Yakubowa, «Sälät» yaşlär üzäge direktorı urınbasarı Igor Smirnow,  Sälät Yortı direktorı, Sälät media üzäge citäkçese Alsu Ganeewa, «Sälät» yaşlär üzäge yaşlär belän eşläü belgeçe, 2021 elda «Sälät-Rauşan» alanı direktorı Ayaz Xanafin buldı.  

Bu elnıñ yañalıgı – barlık äydamannar kwalifikatsiya kütärü turında tanıklıklar aldılar.  

«Äzerlek äle monıñ belän genä tämamlanmıy. Äydamannarnı äñgämälär etabı kötä. Şul räweşle, 2022 nçe elnıñ cäendä uzaçak alannarnıñ komandaları tuplanaçak. Smenalarga äzerlänü, kiçke häm köndezge çaralarga programma tözü kebek kızıklı etaplar da alda!», – di «Sälät» yaşlär üzäge yaşlär belän eşläü belgeçe Ayaz Xanafin.  

Äydamannarnı 12-13 fewraldä Sälät Yortında äñgämälärdä kötep kalabız.