«Әйдаманнар мәктәбе»нең күчмә сессиясе тәмам ← кире кайтырга
Квалификация күтәрү турында таныклыклар, өр-яңа белем һәм җәйгә әзерлекле 150 әйдаман!
30 нчы гыйнвар – 2 нче февраль көннәрендә «Әйдаманнар мәктәбе»нең күчмә сессиясе узды. Ул быел беренче тапкыр «Йолдызлы» базасында үткәрелде. Сессиягә Татарстанның төрле районнарыннан, күрше республика һәм шәһәрләреннән 150 кыз һәм егет җыелды.
«Әйдаманнар мәктәбе» Сәләтнең җәйге аланнары һәм форумнары өчен әйдаманнар командасы туплау өчен оештырыла. Катнашучылар күчмә сессиядә төрле педагогик ситуацияләрне чишү юлларын өйрәнделәр, Сәләт эшчәнлеге белән якыннанрак танышу һәм кичке чаралар үткәрү буенча кызыклы лекцияләрдә һәм тренингларда катнаштылар. Булачак әйдаманнар сменага әзерләнү тәртибе, аланнарда эшләү үзенчәлекләре, төркем төзү этаплары белән дә танышты.
Балалар белән уңышлы элемтә булдыру серләре белән Сәләт аланнарында директор һәм өлкән әйдаман булучылар, чакырылган кунаклар уртаклашты.
Спикерлар арасында психолог, бизнес-тренер Эльвина Бабаева, Сәләт проектлары координаторы, КФУның өлкән укытучысы Элина Насибуллина, Филология фәннәре кандидаты, Сәләтнең Мәгариф һәм уку-укыту технологияләре үзәге җитәкчесе Диләрә Якубова, «Сәләт» яшьләр үзәге директоры урынбасары Игорь Смирнов, Сәләт Йорты директоры, Сәләт медиа үзәге җитәкчесе Алсу Ганеева, «Сәләт» яшьләр үзәге яшьләр белән эшләү белгече, 2021 елда «Сәләт-Раушан» аланы директоры Аяз Ханафин булды.
Бу елның яңалыгы – барлык әйдаманнар квалификация күтәрү турында таныклыклар алдылар.
«Әзерлек әле моның белән генә тәмамланмый. Әйдаманнарны әңгәмәләр этабы көтә. Шул рәвешле, 2022 нче елның җәендә узачак аланнарның командалары тупланачак. Сменаларга әзерләнү, кичке һәм көндезге чараларга программа төзү кебек кызыклы этаплар да алда!», – ди «Сәләт» яшьләр үзәге яшьләр белән эшләү белгече Аяз Ханафин.
Әйдаманнарны 12-13 февральдә Сәләт Йортында әңгәмәләрдә көтеп калабыз.