Äydaman bulasıñ kilsä... ← kire kaytirga
Tizdän «Äydamannar mäktäbe» başlana! Äydaman bulırga telägän eget-kızlarnı kötep kalabız. Ä kem äle «Äydamannar mäktäbe»neñ närsä ikänen belep betermi – bu yazmada barısın da añlatabız. Mäktäp citäkçese Igor Smirnow belän söyläştek.
– Närsä ul «Äydamannar mäktäbe»?
– «Äydamannar mäktäbe» - el däwamında uzdırıluçı, berniçä öleştän torgan zur proekt. Anıñ tögäl genä urını da, wakıtı da yuk, çönki proekt kısalarında berniçä çara uza. Alar arasında: bulaçak äydamannar öçen Sälät Yortında däreslär, 150 saylap alıngan student öçen «Baytik» yal häm sälamätländerü üzägendä küçmä mäktäp, cäyne tögälläüçe «Äydamannar yarışı». Kıskası, oktyabrdän aprelgä kadär bulaçak äydamannar tulısınça uku protsessında katnaşa
– Äydaman bulu öçen «Äydamannar mäktäbe»n ütü kiräkme soñ?
– Sälät alanında äydaman bulu öçen, älege mäktäptä katnaşu - iñ möhim şartlarnıñ berse. Däreslärgä yörmägän, küçmä mäktäptä katnaşmagan studentlar cäen zäñgärsu futbolkanı kiya almayaçak.
– Mäktäp digäç, küz aldına parta artına utırgan ukuçılar, takta yanında basıp torgan ukıtuçı kilä. «Äydamannar mäktäbe»ndä nindi «däreslär» bula? Ukıtuçılar kemnär?
– Äytkänemçä, proekt kısalarında çaralar bik küp. Bulaçak äydamannarga parta artında utırırga da, äylän-bäylän uynarga da, kap-karañgı bülmädä şäm yaktısında söylärgä dä turı kiläçäk. 7 ay eçendä egetlär-kızlar öçen cäyge alannarda kiräk bulgan barlık belemnärne dä citkerergä tırışaçakbız. Monıñ öçen älege yulnı uzgan täcribäle äydamannar, balalar belän eşläüçe psixologlar, ukıtuçılar cälep itelä. Uku-ukıtu programmasına oeştıruçılar zur igtibar birä, çönki bu - «Äydamannar mäktäbe»neñ iñ möhim noktası.
– «Äydamannar mäktäbe»n ütkän keşe närsälärgä iya bula?
– «Äydamannar mäktäbe»n uzgan eget-kızlarga Sälätneñ cäyge alannarında katnaşu mömkinlege birelä. Ämma «Älege mäktäpne uzdım da äydaman buldım» digän fiker döres tügel. Alannar komandasına kuşılu - ozın häm ozak saylap alu protsessı.
«Äydamannar mäktäbe»neñ härber katnaşuçısına maxsus sertifikat tapşırıla. Östäwenä, näk menä bulaçak äydamannar üzläre öçen kiräk bulgan belemnärne tuplap, Sälät äydamannarı öçen maxsus metodiçka tözü östendä eşlilär. Şul räweşle kiçäge sälkeşlär äkrenläp Sälät äydamannarınıñ yaña tarixın yazalar.