Kanadada sälkeşlär awazı belän tatar xalık cırları yañgırıy ← kire kaytirga

2-12-nçe awgust aralıgında, Kanadada berençe tapkır Xalıkara «Sälät-Monreal» yal, uku-ukıtu häm sälamätländerü lagere uza. Kön saen Sälät aktiwistları Tatarstannan häm çit illärdän kilgän millättäşlärebez öçen kızıklı ostaxanälär, mawıktırgıç çaralar ütkärälär. Biredäge programma balalarnı tatar moxitendä tärbiyaläü, milli kolorit belän tanıştıruga yunälderelgän.

Här irtä Niyaz abıy Mortazin belän bergä başlana. Çönki ul balalar öçen küñelle irtänge zaryadkanı ütkärä. Añardan soñ barısı da däreslärgä taralalar.

Kön saen programma buença 3-4 ostaxanä uzdırıla. Wokal däreslären Sälät weteranı, «BikaFest» festiwaleneñ gran-pri iyase, Sälät berläşmäseneñ yaratkan cırçısı, awtor-başkaruçı Läysän Äsxätowa-Arsentewa birä. Biredä 6 bala şögıllänä, anıñ 3 – çit il balaları. Balalar «Änisä» häm «Urmannarda yördem» cırların öyränep ölgergännär inde, yomgaklau kontsertında başkarıp ta kürsätäçäklär. Äydaman Rafael Kamaliew belän Kanada kızı Kamilä «Min yaratam sine» cırına muzıkal çıgış äzerli.

«Änisä» köen sälkeşlär kuray däreslärendä dä yañgırata. Sälät media-üzäge citäkçese Gölşat Gıymadiewa belän berlektä, ansambl dä aktiw räweştä  bäyräm kontsertına äzerlänä. Gölşat apa fikerençä, bar balalar da bik sälätle ikän. «Berençe därestä gammanı häm cırnıñ yartısın öyränep betergän idek inde. Balalarnıñ tırışlıgın kürep küñel söenä. Törkemdä San-Frantsiskodan kilgän ber kız kurayda 3 cır uynarga öyrängän. Tatarstannan kilgän kunaklar öyrätkän ikän. Kanadadan Kamilä dä minem öçen küñelle açış buldı. Xollda torgan pianinanı kürep ul onıta başlagan tatar cırın uynarga mataştı. Bergäläp iskä töşerep, bu muzıka koralında da anı uynarga öyrändek», - di Gölşat Gıymadiewa.

Katnaşuçılar tagın milli alkalar, milli bizäkle otkrıtkalar yasıy torgan ostaxanägä, çigü däreslärenä dä yöri. Anı Aliya Äxmätowa alıp bara.  Törkemgä xätta 2 malay da kuşılgan. «Üz kullarım belän änigä büläk yasarga uyladım. Kaytkaç tapşıraçakmın. Ul anı ozak wakıt söenderep torır!» - dip Islam Mirgayazow fikerläre belän büleşte.

Üzeñne üsterü häm säläteñne kürsätü öçen yunäleşlär baytak. Ilsöyar Xismätowa teatr sängate däreslären alıp bara. Ul üz törkeme belän smenanıñ yabılu tantanasına teatral çıgış äzerli. Balalar Galiäskär Kamalnıñ «Berençe teatr»ın uynap kürsätäçäk.

Blogger Islam Wäliew di-djeing buença ostaxanä alıp bara. 

Aliya Äxmätowa xoreografiya däreslärendä «Ex, almagaçları» cırına biyu kuya.

Egetlär Nadir Kuramşin belän şaşka, şaxmat, östäl tennisı uennarı serlärenä töşenä. 

Smenanıñ iñ keçkenä katnaşuçısına nibarı 3 yaş. «Bäläkäç» klubı da aktiw eşläp kilä. Yunäleş citäkçese Alisä Camaliewa olılardan kalışmasınnar öçen biyulär dä oeştıra, teatral däreslär dä alıp bara. Här könne Kanadanıñ törle poçmaklarınnan 2-3 gailä balaların «Bäläkäç» klubına alıp kilä. Bügen biredä 8 bala tärbiyalänä.

Äti-änilär öçen dä maxsus programma uylanılgan: kinorejisser Ilşat Räximbay tatar filmnarı häm klipların kürsätä. Irtägä, mäsälän, äti-änilär öçen tatar cırları kiçäse uzdırılaçak.

Kiçlären dä aktiw häm küñelle çaralar uza.  «Aulak öy» uenı, «Monreal kiçläre» icadi kontsertı sälkeşärne ilhamlandıra, yaña ürlärgä öndi, duslıknı nıgıta.

Tik barınnan da bigräk sälkeşlärgä milli Sabantuy bäyräme oşagan ikän. Biredä barlık Amerika kontinentınnan kilgän kunaklar katnaşkan. Törle yaştäge millättäşlärebezneñ traditsion uennarnı yaratıp uynawın kürü – aeruça da küñelle buldı. Kiçke şämçektä balalar bertawıştan «Bügen iñ şäp kön ide!» - dip belderdelär.