Anton Graçew IT-texnologiyalärne şäxes üseşe koralı bularak bilgeläde ← kire kaytirga

Bügen, 29-nçı iyul könne, IT-texnologiyalärgä bagışlangan VI Xalıkara yaşlär uku-ukıtu Sälät forumı 2-nçe smenasınıñ töp kunagı Yugarı texnologiyalär ölkäse «IT-park» texnoparkı direktorı Anton Graçew buldı. 

Tatarstan Respublikasında «IT-park» Kazanda häm Yar Çallı şähärlärendä bar.  «IT-park» – keşelärgä üz biznesın, kızıklı mäglümati proektlar buldırırga yardäm itüçe zur komanda ul. Bügenge köndä IT-texnologiyalär zur taralu aldı häm könnän-kön cämgıyatneñ kübräk sferaların üz eçenä ala.

Forum katnaşuçıları belän oçraşuda Anton Olegowiç mäglümati texnologiyalär ölkäsendä uñışka ireşü öçen kiräk bulgan hönäri sıyfatlar turında söyläde. Komandada eşli belü, analitik fiker yörtü, eş söyuçänlek häm zur külämdäge mäglümatnı señderep eşläü – şuşı 4 faktor aeruça da möhim ikän.

Şulay uk kunak zur şatlık xisläre belän «IT-park»nıñ eldan-el üsüen bilgeläp uzdı. Tormışıbıznıñ här ölkäsendä diyarlek zamana texnologiyaläre bar. Ni kızganıç, mäglümati texnologiyalär ölkäsendä töp problema bulıp äti-änilärneñ alarga bulgan skeptik karaşı tora. Ölkän buın keşeläre traditsion hönärlärne, konserwatiw yunäleşlärne otışlırak kürälär. Tik pozitiw misallar da baytak: äti-änise fikerenä kolak salmıyça yugarı texnologiyalär ölkäsendä şäxsi açışların yasagan yaşlär dä bar.

Uñışka ireşü serlären Anton Olegowiçtan Sälät media-üzäge xezmätkärläre dä soraştı.

- Sezne Forumda kürüebezgä çiksez şatbız! Härwakıt teräk buluıgız öçen räxmät!

- Sälät – Tatarstannıñ sınalgan initsiatiwasına äwerelde. Ul üzenä meñlägän bala häm yaşlärne cıya. Yaş buın bezneñ öçen härwakıt prioritetta. Çönki keçkenädän balaga fundament salu kiräk. Fundament digändä min bu oçrakta gadäti tormışka yugarı texnologiyalärneñ ütep kerüen añlaunı atıym. Monı añlagan keşe kiläçäkne dä küzallıy ala. Bügenge mägarif sistemasında da bu yunäleş citmi, şuña da bez şuşı buşlıknı tutırmakçı bulabız. Bezneñ IT-akademiyaneñ Soft Skills, programmalaştıruga kagılışlı berniçä proektı bar. Yaş buınnı üsterüdä bu faktorlar ähämiyatlelärdän sanala. Sälät – balalarnı ukıtuçı şäp programma. Bu xezmätne başkaruçılar – sez buldırasız. Çakıruıgız öçen räxmät!

- Niçek uylıysız, kiläçäktä uñışlı belgeç bulu öçen mäglümati texnologiyalär belän ni yaştän kızıksına başlau kiräk?

- Inde 6 el däwamında biznes-inkubator östendä eşlibez. Bu wakıt aralıgında bez ör-yañadan 200-dän artık törle bizneslarnı torgızdık. Yar Çallıdagı «IT-park»ta 12-16 yaştäge 90% mäktäp ukuçıları buldı. Alar üz küzläre belän älege sistemanı kürdelär. Şunısı da möhim: biredä eşläüçe keşelär kayçandır üz proektları belän kilep, anı üsterä algannar. Kayberäülär bu uñışka keçe yaştän ük ireşä ala.  Misalga, 1,5 million kerem kertüçe şäxsi biznesın buldırgan 14-15 yaşlek balalar da bar. Olılar belän berrättän, köndäşlekne uzıp alar şuşı däräcägä ireşkännär.

- Oçraşudan soñ küp kenä balalar yanıgızga kilep tä aralaştılar. Nindi soraular birdelär?

- Şäxsi proektları turında. Kızganıç, bu proektlarnı tik torgannan gına çınga aşırıp bulmıy. Monıñ öçen bezgä alar yanına barıp eşläü kiräk. Yaki balanıñ küçep kilüen, mäktäp almaştıruın. Kürüegezçä, bu bik caylı protsess tügel. Şuña da eşmäkärlek buença onlayn-kurs buldırasıbız kilä. Bu oçrakta öydän häm ukudan aerılmıy gına bezneñ belän elemtädä bulırga mömkinlek tuaçak. Ingliz telendä Sälät belän berlektä şundıy programmanı çınga aşırıp kiläbez inde.

- Katnaşuçılarga teläkläregez?

- Härçak belemgä omtılıgız. Keşe şul oçrakta gına yaşi, üsä. Keşegä uñaylı bulganda ul ber urında tuktap tora. Ä dönya bit gel alga bara, tik tormıy. Şuña da härdaim ukırga häm üseştä bulırga kiräk.