«Bolgar-Tugan tel» forumınıñ yubileenda bar dönya balaları berläşä ← kire kaytirga

«Sez kilü belän bezneñ Spas rayonına cäy kilde, - dip katnaşuçılarnı sälamläde Spas rayonınıñ kontrol-xisap palatası räise Mansur Gıymatdinow. - Sezne üzebezdä kürüebezgä bik şatbız. Küñelle yallar telim, yaña duslar tabıgız, aldagı uku elında tagın da tırışıp uku öçen köç tuplagız».

15 iyundä V Xalıkara «Bolgar-Tugan tel» çatırlı alanı açıldı. Çınlap ta, şul könnän cäy başlandı! Salkınnar urınına almaşka cılı könnär häm saf hawa kilde.

«Bıel bezneñ yubiley, häm bu bik tarixi mizgel. Ozaklamıy, izge Bolgarnıñ energiyasen alıp, bez bergä Bilär cirenä baraçakbız. Anda meñlägän talantlı, energiyale yaşlär ber komandaga äylänäçäk. Bez babaylarıbızdan kalgan miras xucaları, şuña kürä älege izge, tarixi urınnarnı saklarga tieşbez», - dip iskärtte «Sälät» Fondınıñ başkarma direktorı Timur Söläymanow.

«Bolgar-Tugan tel» neñ geografiyase eldan el kiñäya. Bıel biredä 5 kön däwamında Tatarstan häm kürşe Başkortstan, Samara, Udmurtiya, respublikalarınnan, Perm krae, Kurgan, Tömän ölkälärennän häm xätta Kazaxstannan - barlıgı 425 bala tatar tele häm mädäniyate belän tanıştı.

Forumnıñ töp yunäleşe – tel, icat häm tarix. Ber-bersennän şaktıy aerılıp torsalar da, älege ölkälär balalarnıñ belemen tagın da arttırdı. Ukıtu programması kısalarında tanılgan şäxeslär: icat, fän, IT-texnologiyalär häm cämägat eşlekleläre belän belän oçraşular ütkärelde.

Balalar tarix fännäre doktorı, TR Fännär Akademiyase ägza-korrespondentı Fayaz Xucin, şagıyrä Yoldız Miñnullina, «Tübätäy» tuklanu çeltäre citäkçese Soltan Safin, Tatarstannıñ xalık artistı Rauşaniya Yukaçewa, «Yalkın» häm «Idel» jurnalları wäkilläre belän oçraştı.

«Bolgar-Tugan tel»dä härkem üzen yañaça sınap karıy aldı. Kemder – cır-biyu, wokal, jurnalistika serlärenä töşensä, kemder – şaxmat, kurayda uynau, kün belän eşlärgä öyrände. Balalar xätta üzläreneñ çın gazetasın da buldırdı.

Ak mäçet häm Bolgar muzey-tıyulıgına ekskursiyalär beräüne dä bitaraf kaldırmagandır. Katnaşuçılar barlık tarixi obektlarnı kürä aldı, azan tıñladı, «Ipi muzee»nda telne yotarlık ipi peşerü serlärenä öyrände.

Soñgı kön – iñ kötelgän häm iñ möhim kön buldı. Lager häm anda yaşäüçe balalar belän tanışırga TR Mägarif häm fän ministrı Rafis Borhanow kilde. Yañgır yawuga karamastan, oçraşu bik cılı ütte. Rafis Borhanow berençelärdän bulıp, «Bolgar-Tugan tel» forumınıñ bıelgı cır häm biyuen karadı. Äle moñarçı anı berkayda da kürsätmägännär ide. Rafis aga balalarnı smena tämamlanuı belän kotladı, alga taba uñışlar teläde.

Ä inde irtägä «Bolgar-Tugan tel» çatırlı lagere Bilärgä Sälätneñ berençe forumına bara.