VI «Sämrux» respublika el premiyase niçek uzaçak? ← kire kaytirga

Bügen «Tatar-inform» mäglümat agentlıgında VI «Sämrux» respublika el premiyasenä bagışlangan matbugat konferentsiyase uzdı.

Çarada Tatarstan yaşlär eşläre ministrınıñ berençe urınbasarı Timur Söläymanow, «Sälät» yaşlär üzäge direktorı Aygöl Gabdraxmanowa, «Sämrux-2019» premiyaseneñ «El sälkeşe» nominatsiyase ciñüçese Rälinä Fawarizowa häm tantananıñ rejisserı Islam Waleew katnaştı.

Timur Söläymanow premiyaneñ «Sälät» berläşmäse öçen ähämiyaten bilgeläde: «Sämrux» — el näticäläre häm aldagı köngä korgan plannarnı «Sälät» komandası belän urtaklaşu çarası», - dip atadı.

«Sämrux» premiyasen ütkärä başlaganda, bez här ciñüçegä akçalata büläk birü turında kileştek. Ul summanı «Sälät»tä katnaşkan yaşlär häm ata-analar üzläre cıya. Şundagı akça ciñüçelärgä tapşırıla. Bıel 300 meñnän artık akça kilde. Berençe elda 150 meñ ide», — dide Timur Söläymanow. Matdi baza FundSelet kraudfanding platformasında tuplana.

Bıelgı nominatsiyalär, jyuri ägzalarınıñ eşçänlege belän Aygöl Gabdraxmanowa tanıştırdı. Katnaşu dürt etaptan tora, bıel finalga 64 keşe çıguı turında söyläde, här nominatsiyaneñ üzençäleklärenä tuktalıp ütte.

Uzgan elgı ciñüçelärneñ berse Rälinä Fawarizowa isä süzen «Sälät» xäräkätenä räxmät äytüdän başladı. Üze öçen bu premiyaneñ nikadär ähämiyatle buluın, cämägat häm fän yunäleşendä yaña mömkinleklär açuın söyläde. Üz täcribäse belän urtaklaştı.

Premiyane tapşıru tantanası isä retro stilendä uzaçak. Tantananıñ rejisserı Islam Waleew dekoratsiyalärdä, kayber kontsert nomerlarında 80-90 nçı ellar çagılış tabaçagın söyläde. Säxnädä berençe märtäbä stendap formatında çıgışlar bulaçak. Sälkeşlär, äydamannar häm tanılgan cırçı-kompozitorlar kollaboratsiyaläre kötelüen dä söyläde.

Premiya 24 nçe fewraldä «Piramida» mädäni-küñel açu kompleksında tapşırılaçak. Bıel Rospotrebnadzor taläpläre buença tamaşaçılar sanı cide yözdän artmaska tieş. Tantananı Sälätneñ sotsial çeltärlärdäge akkauntlarında turıdan-turı efirda karap bulaçak.