«Kazan Güzäle» - Aliya Äxmätowa ← kire kaytirga

12 sentyabr könne Gabdulla Tukay isemendäge Tatar Däülät Filarmoniyase säxnäsendä «Tatar kızı - 2019» konkursınıñ masştablı finalı uzdı. Finalga çıguçılar arasında «Kazan Güzäle» isemenä laek bulgan Sälät aktiwistı Aliya Äxmätowa da katnaştı. Üz çiratıbızda anı tagın ber kat täbriklibez. Däräcäle isemgä laek bulgan finalistkanıñ täesirlären sezgä dä citkerergä buldık.

- Aliya, sine tagın ber kat nominatsiyadä ciñüeñ belän kotlıybız! Bezneñ belän dä urtaklaş äle, ni öçen sin bu konkursta katnaşırga buldıñ?

- Räxmät! Minem öçen bu maturlık häm talant konkursı gına tügel, bu tatar telen häm mädäniyaten saklap kalu häm populyarlaştıru maksatın yörtkän masştablı proekt.

Min üzemneñ tatar kızı buluım gorurlanam, äbi-babaylarımnıñ, äniemneñ tatar kızınıñ nindi bulganın añlatkannarı häm şundıy itep tärbiyalägännäre öçen räxmätle. Şuña kürä min üzemne kürsätergä häm bu konkursnıñ ber öleşe bulırga omtıldım.

- Yaşlär arasında mondıy formattagı konkurslar aktual mikän? Äye ikän, närsä belän? 

- Bik populyar! Eldan-el katnaşuçılar sanı arta bara. Konkursnıñ aktuallege: ul eldan-el masştablırak, älege çarada katnaşu bik zur kazanış! Bu üz eşeneñ çın professionalları, tanılgan rejisserlar, xoreograflar, mädäniyat xezmätkärläre belän eşläü öçen menä digän mömkinlek; bu yaña tanışular häm onıtılmaslık mizgellär öçen moxit.

- Älege konkurs siña närsä birde? Katnaşuçılar turında närsä äytä alasıñ?

- Älbättä, älege konkurs miña bik zur täcribä, yaktı xis-kiçereşlär, yaña duslar büläk itte. «Tatar kızı» yardämendä min küp närsägä öyrändem, kızıklı master-klasslarda buldım, üzemä nıgrak ışana başladım. Iñ möhime, bu konkursnıñ atmosferası! Barlık finalistkalar belän bez bik duslaştık. Katnaşuçılarnıñ härkaysı gayat talantlı, akıllı, ciñügä laek. Minem öçen alar belän ber däräcädä bulu – bäxet.

- Älege çaranıñ plyusları belän urtaklaş.

- Plyuslar bik küp: goref-gadätlärne saklap kalu, tugan telne populyarlaştıru, yaña täcribä, kızıklı tanışular, mömkinleklär, onıtılmaslık xis-kiçereşlär, yaktı mizgellär, matur kiemnär, atmosfera!

- Bu ölkädä sineñ aldagı plannarıñ nindi?

- Kiläse maksat: xalıkara etapta Tatarstannı laeklı räweştä täkdim itü.

- Kiläse katnaşuçılarga sineñ teläkläreñ.

- Üzegezgä maksat kuyarga kurıkmagız! Barısın da buldıraçaksız! Xıyalıgız artınnan barıgız! Barısı da sezneñ kulda!