Sälät Forumınıñ räsmi açılışı ← kire kaytirga
Älämnär kütärelde. Räsäy, Tatarstan gimnnarı yañgıratıldı. Sälät berläşmäse gimnı häm marşı da bäyrämne bizäde. Bügen Bilär muzey-tıyulıgında VI Xalıkara yaşlär uku-ukıtu Sälät forumı 2-nçe smenasınıñ açılu tantanası uzdı.
Bäyrämdä möxtäräm kunaklar da katnaştı: «Sälät» Fondınıñ başkarma direktorı Timur Söläymanow, Kazan şähärendä Wengriyaneñ general konsullıgın wakıtlıça başkaruçı Laslo Darotsi, Tatarstannıñ Yazuçılar berlege räise Danil Salixow, Alekseewsk munitsipal rayonı Başkarma komitetınıñ sotsial soraular buença citäkçe urınbasarı Nikolay Çurin häm «Tattelekom» cämgıyateneñ korporatiw klientlar belän eşläü bülege citäkçese Gölnaz Fäxretdinowa.
«Bügen biredä buluıma bik şatmın! Sez şundıy küp: aktiw, maksatçan häm bäxetle! Forumda yaña belemnär genä alıp kalmıyça, yaña duslar da tabuıgızda şigem yuk. Barısı da tañ kaldıra: oeşma da, programma da, balalar da! Kiläçäk buınnıñ şundıy mömkinlekläre buluı, çınnan da, soklandırgıç. Afärin! Uñışlar sezgä!» - dip citkerde Laslo Darotsi.
«Sälät elek-elektän tatar ruxlı yaşlärne tärbiyaläp kilde, mädäniyatebezneñ, tugan telebezneñ totkası buldı. Bügen Bilär cirendä uzuçı şuşı Forumnı küzätkändä dä küñel söenä. Oeştıruçılarga, citäklegebezgä räxmät! Kiläçäktä dä eşçänlegegezdä uñışlar teläp kalam: icat häm fän söyuçe tatarnıñ çın ullarına, kızlarına turı kürsätegez!» - di Danil Salixow.
«Min Forumda berençe tapkır. Kürep soklandım, şakkattım! Sezneñ kıymmätläregez, missiyagez ber balaga gına yunälderelmägän. Geografiyagez kiñ, katnaşuçılarıgız küp, ideyaläregez taşıp tora. Dimäk, sez xalıkka kiräk! Şäxsän üzemnän häm kompaniyabez isemennän barı uñışlar gına teläp kalam! Barlık kuygan maksatlırıgızga da ireşegez! «Bäläkäç»ne kürep, yanäşämdäge sälätle balalar belän aralaşıp alarnıñ tormışta zur uñışka ireşäçägen farazlap bula. Uñışlar sezgä!» - dip, Gölnaz Fäxretdinowa soklanuın yaşermäde.
Kiñäş-teläklär yañgıragannan soñ uku-ukıtu programması başlanıp kitte.
Psixolog Lyutsiya Zakircanowa rayonnardan kilgän delegatsiyalärgä şäxes üsterü häm kamilläşterü buença trening uzdırdı. «Sälät» yaşlär üzägeneñ direktorı Aygöl Gabdraxmanowa, Sälät klubı prezidentı Igor Smirnow klublar eşçänlekläre belän tanıştırdı, Sälät dönyası xakında söyläde. MAXat üseş üzäge wäkilläre «Sälät-Eşmäkär» sälkeşläre öçen maxsus xakaton uzdırdı. Programmalıştıru buença 2 tapkır dönya çempionı Niyaz Nigmätullin üz ölkäseneñ serlären çişte. Forumnıñ möxtäräm kunakları üzläreneñ uñış formulaları xakında söyläde, sälkeşlärne kızıksındırgan soraularga cawap birde.
Üz eşçänlegen Forumnıñ radiosı da däwam itä. «Tatar radiosı» alıp baruçısı katnaşuçılarnı oeştıru komitetı ägzaları, Forum yañalıkları belän tanıştıra.
«2014-nçe elnı berençe tapkır delegatsiya bularak Forumga kilgän idek. Ulım Sälätne bik oşattı, ikençe elga berär alanına barası kilüen belderde. El bue Sälät belän yaşädek, fewraldä gariza tutırdık, «Sälät-Bilär kalası» alanı sayladık. Bügen Aksubay klubı ägzaları biredä. Berençe tapkır kilüçelär dä şaktıy. Älege Forumnan aralaşu, täcribä kötep kalabız. El däwamında klubta eşlärgä citärlek ilham alasıbız kilä.», -dip belderde «Sälät-Aksubay» klubı kuratorı Läylä Muratşina.