«Fänsar» üzägen sälkipuşlar awazı canlandırdı ← kire kaytirga

Uzgan yallarda, «Fänsar» fän häm mägarif üzägendä ellar belän sınalgan duslık, balalarnıñ şat awazları häm çın gailä moxite xökem sörde. Çönki biredä öçençe tapkır «Sälät-Gailä» smenası ütte.  Anı üzläre dä kayçandır sälkeş bulgan, bügenge köndä bäxetle äti-äni rolen başkaruçı Sälät weterannı yaratıp şulay atıy. «Sälät-Bäläkäç» proektı tarafınnan oeştırılgan älege smena üzendä 10 Sälät gailäsen cıydı. Smena turında älege proektnıñ citäkçese Güzäl Xäsänowa belän söyläştek.

- Güzäl, kabattan «Fänsar»da cıelgansız ikän.

- Äye, «Sälät-Gailä» smenası bezneñ öçen inde traditsiyagä äwerelde. Anıñ belän «Bäläkäç» klubınıñ yaña uku elın da başlap cibärdek. 7-nçe oktyabr könne, Sälät yortında berençe däres uzaçak.

- Niçä keşe katnaştı?

- 30.

- Programma turında söyläp üt äle.

- Programmada ukıtuçılar belän däreslär, muzeyga baru, sport çaralarında katnaşu, gailä estafetası karalgan ide.

- Sineñçä, smena niçek uzdı?

- Şäp! Bez kötkännän äybäträk buldı, miña kalsa.

- Sineñ öçen «Bäläkäç» närsä ul? Älege proekt ni belän kızıklı?

- «Bäläkäç» bik küp äti-änilärneñ, Sälät weterannarınıñ xıyalın çınga aşırdı.  Alar balalarınıñ tärbiyalärenä zur igtibar birä, sabıynı köçläp, kurkıtıp tügel, ä kızıksındırıp ukıtırga kiräklegen äybät añlıy. Tagın bügenge cämgıyattä indiwidual karaş digän töşençä dä bik möhim. Häm, älbättä, telebez, mädäniyatebez saklanıp kalsın ide dip tä tırışabız.

- Äye, keçe yaştäge balalarga belem birgändä bu faktorlar bik möhim şul.

- Mäktäpkäçä yaştäge bala bar mäglümatnı da bik tiz señderä. Şuña alarnı üsenderep, ilhamlandırıp, yaña ürlärgä öndäp torırga kiräk! Şartlar buldırırga kiräk. Balaga bu moxittä emotsional yaktan da, fizik yaktan da uñaylı bulırga tieş. Bezneñ gailä öçen «Sälät-Bäläkäç» üzençälekle proekt: biredä balalarıbız, duslarıbıznıñ balaları häryaklap üsä.

- Balalarga häm alarnıñ äti-änilärenä teläkläreñ.

- Yaña uku elı başlandı. Bez tagın betmäs-tökänmäs eş dönyasına, mäşäkatlärgä çumdık. Üzennän-üze xätergä ber Amerika uniwersitetınıñ fälsäfä fakultetı galime uzdırgan täcribä kilä. Ul ber sawıtka başta ping-pong şarların tutırgan. Urın kalmagaç çuertaş sala başlagan, annarı – kom, su... Tormışta da şulay bit: anı başta iñ möhim häm kiräkle elementlar belän tutıru kiräk. Gailä, balalar, sälamätlek diseñme... Çuertaş, su, kom kebek wak-töyaklärdän başlasak möhimräk äyberlärgä urın kalmas. Zur eşlär belän tulı könnäregezdä iñ möhimen aerıp alıp, prioritetlarıgıznı döres urnaştıruıgıznı telim.