Läysän Arsentewa dönyaküläm iktisad forumında Räsäyne täkdim itäçäk ← kire kaytirga

KFUnıñ iktisad fakultetı dotsentı, Sälät aktiwistı Läysän Arsentewa 2018-nçe elnıñ gıynwar aenda Dawosta uzaçak dönyaküläm iktisad forumında Räsäyne täkdim itäçäk. Ul Global Shapers Community proektında katnaşıp iñ yaxşılar rätenä kerde. Forumda biznes, säyasät  häm başka ölkälärdä uñışlı eş alıp bargan citäkçelär katnaşa.

Älege bäyge el saen katnaşuçılarnı portfolio aşa cıya. Yaşlär ireşkän uñışları xakında üz illärendä genä tügel, çit töbäklärdä yaşäüçelär belän aralaşıp, fikerläre belän urtaklaşalar. Portfolio  aşa uzgan häm iñ yaxşılar dip sanalgannar dönyaküläm iktisad forumında katnaşu bäxetenä ireşä. Bıel isä Räsäy danın berdänber keşe – Sälät aktiwistı Läysän tanıtaçak.

Läysän Sälätkä 2004-nçe elda kilep kerä.  

«Sälät-Bilär» smenasına küp kenä bäyge, olimpiadalarda katnaşıp, TNW kanalınıñ alıp baruçısı bularak elägä. Berençe elda uk sarı galstukka iya bula. «Bikafest» festiwalendä elegräk katnaşuçı, ä bügenge köndä jyuri sostawında katnaşa. «Sälät-Bäläkäç» proektında wokal däresläre alıp bara. Bıel ul berençe tapkır Kanadada uzdırılgan «Sälät-Monreal» alanınıñ oeştıru komitetı ägzası buldı.

2011-nçe eldan Läysän fängä kilep kerä. KFUda bügenge köndä iktisad yunäleşen saylap, ukuçılarga konkurentlık ostalıkları buença lektsiyalär ukıy.

««Kazan şeyperlar mäktäbe» proektın Kazanda buldırgan, şulay uk Sälät aktiwistı bulgan Dilbär Sadıkowa belän bez tormışta da dus, älege proekt östendä eşläüçelär dä. Näk menä ul miña Shapers Community proektında katnaşırga täkdim itte. Barısı da uñışlı kilep çıgar dip ışanıp kalam» - dip fikeren belderde bezgä Läysän.

Läysän, uñışlar telibez! Alga taba da Sälät proektlarında da katnaşıp, fänni ölkädä dä zur däräcälärgä ireşüeñä şigebez yuk. Afärin!