MEDIA BILER FORUM açık dip iglan itelde! ← kire kaytirga

21-nçe iyuldä IX Xalıkara «Cälät» yaşlär uku-ukıtu forumınıñ öçençe smenası – MEDIA BILER FORUM başlanıp kitte!

MEDIA BILER FORUM – sotsial mediaresurslar belän eşläü öçen kiräkle aktual instrumentlarga, şulay uk radio häm telewidenie eşçänlege neçkäleklärenä bagışlangan smena. Ul yaş jurnalistlarnı, blogerlarnı gına tügel, alar belän turıdan-turı xezmättäşlek itüçelärne - awtorlar, kreatiw direktorlar häm brend-menedjerlarnı da cıya.

Smena programması kısalarında äydäp baruçı belgeçlär belän uku-ukıtu sessiyaläre häm oçraşular, ostaxanälär häm fiker alışu mäydançıkları, gamäli häm icadi biremnär karalgan. Här katnaşuçı algan belemen häm künekmälären gamäldä sınap karıy alaçak.

Bu forumda Sälätneñ ike profille smenası – «Sälät-Gayrät» häm «Sälät-Sanak», şulay uk Tatarstan rayonnarınnan kilgän aktiwistlar katnaşa.

Bügen balalar Bilär cirlegenä kilep urnaştı. Alar öçen welkom-tur oeştırıldı, köndez forumnıñ gala-kontsertına çıgışlar saylap alu buldı.

Sägat 18:30-da Selet Live onlayn studiyasendä turıdan-turı efir uzdı. Bilär cirlegennän turı efirlar forumnıñ här könendä çıgıp bara. Anda forum xäbärläre, interwyular, kızıklı reportajlar häm başka yañalıklar kürsätelä.

Kiçke aştan soñ MEDIA BILER FORUM-nıñ räsmi açılu tantanası buldı. Katnaşuçılarnı «Sälät» yaşlär üzäge direktorı Aygöl Gabdraxmanowa sälamläde. «Menä, nihayat, kabat Bilärgä kayttık! Äydägez, Bilär cirlegen, Xucalar tawın, Izge Çişmäne sälamlik äle. Bez sezne el däwamında kötäbez, karşılarga äzerlänäbez, nihayat, şuşı mizgel kilep citte. Räxmät süzlären dä äytep kitik. Äydamannarga, başcitäklärgä, ostazlarga, oeştıruçılar komandasına zur räxmät. Alar şuşı forumnı uzdıru öçen el däwamında äzerlänälär. Älbättä, sezneñ äti-äniläregezgä, ukıtuçılarıgızga bik zur räxmät. Bezne monda el däwamında kabul itüçe Alekseewsk munitsipal rayonı başkarma komitetına da, barlık ministrlıklarga häm, älbättä, prezidentıbız Röstäm abıy Miñnexanowka da räxmätlärebezne belderäbez», – dip söyläde ul. Häm oeştıruçılar komitetınıñ ber öleşe belän tanıştırıp kitte. Forum katnaşuçıları Bilär älämen kütärde, häm MEDIA BILER FORUM räsmi räweştä açık dip iglan itelde.

Açılu tantanasınnan soñ «Kiçke Bilär» digän improwizatsion şou uzdı.