250-dän artık sälkeş bügen sarı futbolka kiyaçäk ← kire kaytirga

Bügen 250-dän artık sälkeş Bilärdäge «Fänsar» fän häm mägarif üzägendä ütäçäk «Sälät-Imänkäy» häm Laeş rayonındagı «Zwezdnıy» yal häm sälamätländerü lagerendäge «Sälät-Şäxes» alanına yunälde.

Balalarnıñ yartısı bıel Sälättä berençe tapkır ikän. Dimäk, bezneñ Sälät gailäse dä üsä. Bez dä, üz çiratıbızda, koçagıbızga tugan tatar telebezne söyuçe fikerdäşlärebezne alırga äzer. «Sälät-Şäxes»kä Tatarstannan gına tügel, Ästerxan, Ijewsk, Samara, Mäskäüdä yaşäüçe millättäşlärebez dä kilüe bik küñelle xäl.

«Minem abıem Sälättä bulgan ide. Anıñ kiñäşe buença min dä barırga buldım. Üzem biergä, cırlarga, icatnı yaratam. Biredä dä çıgış yasarga telim. Tatarstanga keçkenä çagımda ber kilgän idem, xäzer menä ikençe tapkır. Bik oşıy! Smenada tatar telemne kamilläşteräsem kilä», – di Ästerxannan kilgän Nuriya Işniyazowa.

«Kazanga berençe tapkır smenaga barır öçen kildem. Sälät turında tanışlarımnan işetep beläm. Tatar telen añlıym, tik üzemä söyläşergä älegä awırrak. Smenada öyränäçäkmen inde. Häm, älbättä, yal itäçäkmen», – dip belderde Mäskäü tatarı Artur Siraciew.

Alannıñ komandasında – täcribäle äydamannar. Alarnıñ kübese inde 4-nçe tapkır äydaman, kayberläre ütkän smenalarda direktor da bulgannar. Äydaman abıy-apalarnıñ töp maksatı – balalarga onıtılmaslık smena häm xis-kiçereşlär büläk itü.

«Min üzem Sälättä 2015-nçe eldan birle. Berençe tapkır äydaman bulıp «Sälät-Şäxes»kä bargan idem. «Sälät-Şäxes» – ul minem smena! Sälät miña üsü mömkinlegen birä, biredä üzemne taptım. Duslarım da bik küp! Ä balalar mäxäbbäte här cäyne üzenä tarta. Şuña da min bügen monda kızıl futbolkada basıp toram. Sälkeşlär, üzegezne ezlägez! Monı sezneñ öçen berkem dä eşlämiyaçäk. Üzegez öçen yaña dönya, yaña ofıklar açıgız! Iñ möhime – teläk häm barısın da buldırırsız!» – dip teläde smenanıñ ölkän äydamanı Roman Strelnikow.

Terkälü uzgannan soñ smenanıñ direktorı Albina Kadirowa häm «Sälät» Fondınıñ başkarma direktorı Timur Söläymanow ta äti-änilärgä, sälkeşlärgä teläklären citkerdelär.

«Bez biredä zur, dus-tatu gailä. Tik härberebez – unikal häm kabatlanmas şäxes. Sälät sezne häryaklap açarga äzer. Inde bügennän uñışlı kilägägegez öçen nigez sala başlaçagız bula», – di Timur Söläymanow.

Äti-änilär dä balalarınıñ tormışta üz yulların tabuın kaygırtuları bilgele. Monıñ öçen alar Sälät berläşmäsen saylap algannar.

«Balam Sälät turında duslarınnan işetep kaytkan ide. Üzem dä berläşmäneñ eşçänlege turında ber tapkır gına işetmädem. Annarı bergäläşep sotsial çeltärlärdä küzätä başladık. Ä yunäleşne inde ul üze saylap aldı. KWN belän küptännän kızıksına, cırlıy da, bii dä.  Ulımnıñ sälätle yaşlär arasında tärbiyalänüen telim. Şuña da bez «Sälät-Şäxes»kä kildek.  Biredäge balalar berençe karaşka uk, çınnan da, bik sälätle. Tormışta üz yulların tabaçaklarına ışanam. Bezdän – äti-änilärdän teläk şul!» – di Kazannan Landış Äxmätcanowa.

Üseş yulıñnı smenada tabu awır tügel. Inde aldanrak iglan itelgänçä, bıel smenanıñ uku-ukıtu programması 3 yunäleşkä bülengän: KWN, şäxsi üseş häm keçe yaştäge balalar törkeme öçen maxsus bülek. Bik küp kızıklı kunaklar, tanılgan KWNçılar, aldıngı ukıtuçılar da kötelä. Ä smenanıñ iñ kötep alıngan wakıygası – «Iske Kazan cıenı» bulaçak.

Xäerle sägattä, sälkeşlär!