«Sälät» forumında icat kollektiwları citäkçeläre öçen «Ostaz» uku-ukıtu mäydançıgı start aldı ← kire kaytirga

Bilärdä bu könnärdä XI Xalıkara «Sälät» yaşlär uku-ukıtu forumınıñ ikençe smenası - ICAT BILÄR FORUM (Tworçestwo/Arts) uza.

Bıel ICAT BILÄR FORUM (Tworçestwo/Arts) 5 ellıgın bilgeläp ütä. Yubiley smenası kısalarında forumga kilgän kollektiw citäkçeläre öçen «Ostaz» proektı oeştırıldı. Bu balanı şäxes bularak tärbiyaläü, dustanä mönäsäbätle kollektiw buldıru, anı üsterü temalarına bagışlangan ostaxanälär häm däreslär.

Bez «Ostaz» proektı citäkçese Dilärä Yakubowa belän proektnıñ ideyase häm maksatları turında söyläştek, şulay uk dürt belem birü köneneñ härbersendä kollektiw citäkçelären närsälär kötkänen beldek.

Dilärä, proekt öçen nigä şundıy isem saylangan?

«Ostaz» süze «ukıtuçı» häm «äydäp baruçı» digänne añlata. Bez, üz ölkälären bik äybät belgän, osta keşelärne şulay atıybız. Bu mäydançıkta katnaşuçılar - professionallar, kollektiw häm indiwidual başkaruçılar citäkçeläre - yagni üz eşläreneñ çın ostaları.

«Ostaz» proektın buldıru ideyase niçek barlıkka kilde?

Proekt ideyase 2018 elda berençe smenadan soñ uk barlıkka kilde. Bez balalarga intensiw programma äzerlädek, ä alarnıñ citäkçeläre öçen berni dä bulmadı. Alarga da yaña belemnär tuplau mömkinlege biräse, şulay uk citäkçelär üzara aralaşa häm täcribäläre belän urtaklaşa alırday mäydançıklar buldırası kilde.

Temalarnı häm spikerlarnı niçek sayladıgız?

Bıel bez barlık yunäleş citäkçelären cıydık häm zur kiñäşläşü uzdırdık. Bez uzgan ellar täcribäsenä häm küzätülärenä tayandık, bezneñ kunaklarga kızıklı, faydalı bulırlık temalar häm spikerlar turında ozak uyladık. Bıel bez elekkegeçä spikerlarga karap tügel, ä yunäleşlärdän çıgıp sayladık dip äytergä mömkin.

Belem birü protsessı niçek tözelgän?

Programma üz eçenä dürt belem birü könen ala. Berençe kön citäkçeneñ lider, trener häm ostaz bularak küpkırlı rolenä bagışlandı. Bezneñ balalar belän eşläü texnologiyalärenä bagışlangan sessiyalär bar. Bu bigräk tä möhim, çönki här trener yaşlärne öyrätä, ä monı näticäle eşlärgä kiräk.

Kiläse könnärdä nilär bulır?

Ikençe könne bez şartlı räweştä «Icat itü sängate» dip atadık. Ul turıdan-turı bezneñ citäkçelärebez eşli torgan iñ icadi ölkägä bagışlangan. Şulay itep, bez könne barısına da faydalı itärgä tırıştık.

Öçençe köngä bezgä «Yaşäü sängate» proektı komandası kilä, bez anı şulay atadık ta. Kinematograf küzlegennän teatr turında lektsiyalär bulaçak, çönki bu ölkädä bezneñ öç yunäleş üzara totaşa. Üzeñneñ tar belgeçlegeñnän beraz eragaep, böten protsesska çittän, kino küzlegennän kararga mömkin.

Yomgaklau könen bez «Sälätlärne üsterü sängate» dip atadık, ul şäxsi brend häm kollektiw obrazı östendä eşläügä bagışlanaçak, şulay uk katnaşuçılar niçek döres itep anıñ üseşen täemin itärgä kiräklegen belä alaçak.

Spikerlar arasında Tatarstan häm Rossiyaneñ aldıngı mädäniyat häm sängat eşlekleläre: Andrey Rudenko, Elwina Babaewa, Alyona Wdowiçenko, Luiza Skipina, Adilä Xaybullina häm Mariya Yaselskaya. Uku näticäläre buença tügäräk östäl uzaçak, anda katnaşuçılar täesirläre häm täcribäläre belän urtaklaşa alaçak.