Sälättä yaña proekt: «Talkış kalewe» diskussion klubı ← kire kaytirga

«Tellär belgän – illär gizgän» dilär. Sälät berläşmäse üzeneñ 50 proektına östäp tagın ber yaña proekt başlap cibärä. «Talkış kalewe» ingliz telendä uzuçı diskussion klubnıñ kiçä berençe oçraşuı uzdı. Proekt citäkçese Dilärä Kärimullina belän oçraşıp älege proekt turında fiker alıştık.

- Dilärä, Sälättä sin niçänçe eldan? 

- 2014-nçe eldan. Cäy saen «Sälät-Rauşan» smenasına bara idem. Bu smenaga ber eläksäñ, çıgıp bulmıy. Dus, tatu komanda üzenä härwakıt tartıp tora.  Nindi genä xällärdä kalsañ da, yardäm kulın suzarlık komanda. Barısınıñ da yözendä şatlık, bäxet nurı börki, energiyaläre taşıp tora.

- Sälät sineñ öçen ul  – …

- Berençe çiratta, duslar. Sälät tagı da üsärgä yardäm itüçe, motiwatsiyagä öndäüçe mäydan. Sälätkä kilgän saen min üzemä nindi dä bulsa yañalık açam. Sälät arkasında min häryaklap talantımnı üsteräm.

- Ni öçen bu proektka alınırga buldıñ?

- Min, kıçganıç, tumışım belän Kazan kızı tügel, şuña da Sälät proektlarında bik aktiw katnaşa almadım. Läkin xıyalım zurdan ide. Bügenge köndä min KFU studentı. Sentyabr aenda «Fänsar»da uzgan Sälät aktiwı mäktäbendä katnaşkannan soñ, älege proektnı tormışka aşırasım kilgänen belderdem. Min çit il telläre belän kızıksınam. Aeruça ingliz häm ispan telläre küñelemä yakın. Bu tellärne tiränten öyränü östendä eşlim. Bu proekt kısalarında üzem dä häm proektta katnaşuçılar da telllären kamilläşterä alaçak. Üzegez beläsez, mäktäplärdä bezgä kübräk teoriyasen öyrätälär, ä monda ber-bereñ belän aralaşıp praktik yaktan telne yaxşırtıp bulaçak. Şunı da äytep ütäsem kilä: däreslär barı tik ingliz telendä genä uzaçak.

- Ni öçen «Talkış kalewe»?

- Bu ideya iptäş kızım belän ber söyläşep utırganda tudı. Proekt isemenä Talk, Speak, Share kebek süzlär häm, älbättä, tatar süze dä kertäse kilgän ide. Bez bit Sälätlelär! Tellär genä öyränep kalmıyça, tatar milli rizıkları belän çäyläp alular da küzdä totıla. (Kölä)

- Täm-tomnar belän çäy eçärgä kayçan kilergä? (Kölä)

- Här atnanıñ çärşämbe könendä törle temalarga dialog formatında aralaşaçakbız, ä düşämbe könne ingliz telendä filmnar kararbız dip planlaştırdık.  Spell battles, kürenekle keşelär belän oçraşular, master-klasslar da küzdä totıla.

- Sälkeşlärgä teläkläreñ? 

- Sälätkä kilegez. Mömkinlek çıguga uk Sälättä bulırga tırışıgız. Faydalı yal itegez. Küñelegezgä närsä oşıy, şul ölkäne saylap, alga taba da üsärgä tırışıgız. Üz-üzegez bulıp kalıgız häm onıtmagız: kübräk köç kuygan saen, näticäse dä yaxşırak bula.