Sälät köçe – direktorlarda ← kire kaytirga
19-nçı dekabr könne Sälät yortında «Sämrux» premiyaseneñ 2017-nçe el öçen saylap alu turları tämamlandı. Berniçä atna däwamında jyuri ägzaları törle-törle çıgışlar karadılar, şular arasınnan iñ yaxşıların saylap aldılar. «El direktorı» nominatsiyase, gadättägeçä, iñ katlaulısı.
Bu yulı jyuri ägzaları karşında küp kenä proektlarda katnaşıp, ciñülär yaulagan 4 iñ köçle citäkçe çıgış yasadı.
«Sälät» fondınıñ başkarma direktorı Timur Söläymanow, direktor roleneñ ähämiyaten assızıklap ütte. «Direktor – iñ möhim keşe. Iñ elek üzenä komanda tuplıy, soñınnan komanda belän smena östendä eşli häm inde 18 kön eçendä gadi balanı sälkeşkä äyländerä. Bu – bik zur eş. Sälät xäräkäteneñ köçe – sezneñ kullarda! Bergä bulıyk, berdäm bulıyk!», – dip, bilgeläde Sälät liderı.
Original çıgış belän «Sälät-Saba 2017» alanınıñ direktorı Rufat Kıyamow başlap cibärde. Alannıñ yomgaklau planerkası formatında Rufat näticäle eş öçen, jyuri ägzaları yözendä bulgan «komandaga» zur räxmätlären citkerde. Üze citäklägän alannıñ köçle şäxeslär häm cılı, ışanıçlı mönäsäbätlärgä genä iya bulgan sälkeşlär belän aerılıp torganın bilgeläde. Kalgan katnaşuçılardan ni belän aerılıp toruın soragaç, Rufat «komandaga yaxşı keşelärne taba alu belän» dip, cawap kaytardı.
«Tormış yulı – ul törle stantsiyalär» – dip, üzeneñ çıgışın «Sälät-Iske Kazan 2017» alanı direktorı Bulat Waliullin başlap cibärde. Ul, Sälät berläşmäsenä säyaxäten, xäräkät itüçe poezd belän çagıştırdı. Final nokta bulıp, «sälkeş» punktı buldı. Katnaşuçı bu punktnı, zur kiläçäkkä iltüçe, iñ möhime dip sanadı.
«Sälkeş – ul nigez, sineñ şäxes bularak formalaşu, küp kenä belemnärne tuplau aralıgı. Bu wakıtta sineñ başlangıçlarıñda yardäm kulı suzuçı ostazlar bulu – bik möhim. Sälättä, barlık sälkeşlär öçen dä, ul – äydamannar» – dip, bilgeläde Bulat.
Premiyaneñ bu saylap alu turında, kreatiw çıgışlar da buldı. Däülät eşlekleläre, Sälät citäkçeläre belän «Sälät-Rauşan 2017» alanı direktorı Igor Smirnow üzeneñ eşçänlegen şayan formada, çagıştıru räweşendä kürsätte. Räsäy Federatsiyase prezidentı Wladimir Putin belän Igornı çit tellär, açık tösle çäç häm uñ kulga sägat kiep yörü, ä inde Tatarstan Respublikası prezidentı Röstäm Miñnexanow belän alarnı instagram akkauntları häm säyaxätlär bäyli. Misal öçen: «Ul – Kıtayda, min – «Fänsar» üzägendä Bilärdä, ul – Törkiyadä, min – haman da Bilärdä». «Sälät» fondınıñ başkarma direktorı Timur Söläymanow sıman Igor «El liderı»nda katnaşkan, ä «Sälät» yaşlär üzäge direktorı Aygöl Gabdraxmanowa kebek instagramda üzeneñ xeştegı barlıgın söyläp kitte.
Katnaşuçı tormışındagı iñ töp citäkçeläre bulıp, ätise belän änisen sanıy. Igorga ätisennän gitara, ä änisennän rifmaga salu säläte küçkän. Çıgışnıñ axırında katnaşuçı Sälät xäräkätenä iñ matur mizgellär öçen räxmäten belderep, üze yazgan cırnı gitarada başkardı.
Soñgı bulıp, «Sälät-Aznakay 2017» alanı direktorı Dilärä Sabitowa çıgış yasadı. Menä inde 2 el Dilärä älege alannı citäkli. Üzeneñ häm balalarnıñ ixtiyaclarına tayanıp, smenanıñ yañalıkları turında söyläde.
Dilärä, komanda belän berlektä üzeneñ kagıydälären, balalarnıñ yalı öçen yaña belem birü eşçänlege formatın oeştırdı, Sälät xäräkäteneñ barlık kagıydälärenä turı kiterep, alanga katnaşuçılarnı sayladı.
Prezentatsiyane, Dilärä, rus telendä söyläde, läkin çıgışnıñ axırında Xäsän Tufannıñ «Kaysıgıznıñ kulı cılı?» şigıren söyläp, tatar telen belü däräcäsen dä dälilläde.
Soñgı konkurs – blits-opros betkäç, jyuri ägzaları kiñäşläşep, ciñüçene sayladılar. Xäzer katnaşuçılar häm canatarlar ciñüçeneñ isemen beler öçen iñ dulkınlandırgıç, matur mizgelne kötälär. 2018-nçe elnıñ 8-nçe fewralendä «El direktorı» isemenä laek keşeneñ isemen «Sämrux» premiyaseneñ tantanalı büläkläü könendä, G.Tukay isemendäge Tatar Däülät Filarmoniyasendä belerbez.
«Sämrux-2017» premiyaseneñ partnerları: «Tübätäy» tatar milli tiz tuklanu çeltäre, SELETSTORE yaşlär kieme häm aksessuarlar kibete, «Bratya Zaripowı» agenstwosı, «Rocket Records» tawış yazdıru studiyase, G.Kamal isemendäge Tatar däülät akademiya teatrı, «Widimıy swet» foto häm wideo studiyase, FUN24 küñel açu häm «Ixsan» trening üzäge.
Sälät Media-mäktäbe ukuçısı Alinä Sısoewa