Yazgı sessiyagä äzerlek başlana ← kire kaytirga

Duslar, sizäsezme, yaz täräzä şakıy başladı. Dimäk, bik tizdän «Fänsar» mäktäbeneñ yazgı sessiyase uzaçak digän süz.  Yazgı sessiya – yazgı kanikullar wakıtında östämä belem alırga teläüçelär öçen ber digän mömkinlek. Mäktäpneñ eşçänlege, anıñ üzençälekläre xakında yazgı sessiyaneñ direktorı Alsu Salawatowa söyläde.

- Alsu, smenanıñ ideal katnaşuçısı – ul nindi?

- Yazgı sessiyagä saylap alu, gadättägeçä, portfoliolar buença başkarıla. Berençe çiratta, balanıñ fänni häm icadi uñışlarına igtibar biräbez. Şulay uk mäktäptäge ölgereş tä möhim.

- Proektta katnaşu Sälät aktiwistlarına nindi mömkinleklär birä?

- Mäktäp ukuçıları öçen bu belem birüneñ yaña formatında mäktäptän tış östämä belem alu mömkinlege. Şulay uk katnaşuçılar üzlären fänni-praktik konferentsiyadä sınap karıy alaçak. Bezneñ ukıtuçılar – yugarı belem birü uçrejdenieläre aspirantları, alar balalarga däreslär kızık häm mawıktırgıç bulsın öçen bar köçlären kuyalar. Proektta äydaman rolendä studentlar da katnaşa ala. Alar isä smena kızıklı, faydalı ütsen öçen tırışa. Studentlarga bu täcribä tuplau öçen dä yaxşı.

- Sessiyadä ukıtılaçak predmetlar niçek saylap alına?

- Balalar fikerennän çıgıp eş itäbez. El saen yaña predmetlar kertergä tırışabız. Bıel, mäsälän, küpsanlı soraular buença ädäbiyat fänen östiyaçäkbez. 

- Fänni-praktik konferentsiyadä kem katnaşa alaçak?

- Barlık teläüçelär. Biredä üz proektıñnı täkdim itü kiräk. Törkemläp çıgış yasasañ da yarıy. Ostazlar sıyfatında – ukıtuçılarıbız eşli. Alar belän bergä ukuçılar tema saylıy, fiker alışa, çıgışka äzerlänä. Äzerlek öçen däreslärdän soñ maxsus sägat bülep birelä.

- Sessiyaneñ üz traditsiyaläre barmı?

- «Fänsar» –  ul mäktäp, bezneñ üzebezneñ çıgarılış ukuçılarıbız bar. Şuña da bez çıgarılış kiçäse dä uzdırabız, uku tämamlanuı xakında attestat tapşırabız, kıñgıraular çıñlatabız. Ukuçılar isä kiçke çaraga icadi çıgış äzerlilär.

- Ukuçılar belän tagın eş alıp barılamı?

- Çıgarılış sıynıf ukuçıları «Fänsar»ga yaña statusta – äydaman bularak kilälär. Üzläre dä şuşı mäktäptä katnaşkanga kürä, alar eçke moxitne yaxşı belälär, räxätlänep aralaşalar, ürnäk bula belälär. Gomumän alganda, bezdä mäktäp ukuçıları belän studentlar üzara bik tatu.

Sälät media-mäktäbe ukuçı Alinä Sısoewa