Röstäm Miñnexanow: «Sälät berläşmäse eldan-el üsä!» ← kire kaytirga

Bügen, yagni 13-nçe iyul könne VI Xalıkara yaşlär uku-ukıtu Sälät forumınıñ räsmi açılış tantanası uzdı.

Bügen Forum eşçänlegendä Tatarstannıñ barlık rayonnarınnan, Räsäy töbäklärennän, yakın häm erak çit illärdän kilgän 5500 sälätle bala häm yaşlär katnaştı. Sälät alannarı katnaşuçılarına Tatarstan Respublikası häm Samara ölkäse delegatsiyaläre dä kuşıldı.

Palatkalı şähärçek häm «Fänsar» fän häm mägarif üzäge territoriyasendä Forumnıñ töp teması – «4-nçe sänägat rewolyutsiyase kontekstında belem alu» ölkäsen açuçı Tatarstannıñ tanılgan şäxesläre belän berlektä 30 uku-ukıtu mäydançıgı eşläde.

Forumnıñ töp kunagı, inde traditsiyagä äwerelgänçä, Tatarstan Respublikası Prezidentı Röstäm Nurgali ulı Miñnexanow tora.

 Respublikabız başlıgı berençe eş itep «Fänsar» fän häm mägarif üzäge eşçänlege belän tanıştı. Biredä «Ädip yortı» tözelgän, yaña zur basseyn buldırılgan ide. «Ädip yortı»nda Prezident Sälät smenaları katnaşuçıları belän oçraştı, çit ildän kilgän sälkeşlär belän aralaştı, yaña «Sälät-Monreal» proektı katnaşuçıları belän skayp-konferentsiyadän söyläşte.

Berençe tapkır Üzäk territoriyasendä su polosı buença yarışlar uzdı. Töp xökemdar – Olimpiya uennarı prizerı, Räsäy Federatsiyase Däülät Dumasınıñ 7-nçe çakırılış deputatı Irek Zinnurow.

Palatkalı şähärçek territoriyasendä Röstäm Nurgaliewiçnı Sälät alannarı sörännär belän karşı aldı.

Prezident «Uniwersitet talantow» oeşmasınıñ küpprofille praktik yunäleş birüçe «Professii buduşçego» kampusında da buldı. Biredä Respublikaküläm «TRnıñ Studentlar xezmät törkemnäre» üzäge operator bularak çıgış yasadı.

«SeletStore» proektı citäkçese Röstäm Miñnexanowka Sälät tolstowkasın büläk itte. Anı kigäç Prezidentıbız tagın da Sälät moxitenä çumdı.

Syurprizlar monıñ belän genä betmäde äle. «Milli aşlar» ostaxanäsendä bertugan Zaripowlardan tatar kuxnyası aşlarınnan awız ittek.

«Bäläkäç» çatırında ul Forumnıñ iñ näni katnaşuçıları – Sälät gailäläre balaları belän tanıştı.

TR Prezidentı yardämçese Nataliya Fişman, Sälät Fondınıñ başkarma direktorı Timur Söläymanow häm Kazan däülät arxitektura-tözeleş uniwersitetı wäkilläre täkdim itkän Bilär şähärçegen kamilläşterü kontseptsiyasen Röstäm Nurgali ulı äybät dip taptı.

Forumnıñ general media-partnerı – «Tatar radiosı» radiostantsiyase. Anıñ baş möxärrire Aywaz Sadırow belän tapşırular prodyuserı Almaz Gıylmetdinow uñış formulaları belän büleştelär, lider bulu seren çiştelär.

Çaranıñ kulminatsion noktası bulıp Forumnıñ bıelgı cırına biyu tordı. Anı cırnıñ awtorı Sälät weteranı Ilnaz Safiullin başkardı, sälkeşlär aña köç-kuät östäp biedelär.

«Barıgızga da xezmätegez öçen  räxmät! Eldan-el Sälät berläşmäse üsä. Xätta Respublikabızdan çittä dä tamır cäygänsez, çit ilgä kadär çıkkansız. Sezgä kiläçäktä dä teräk bulırga äzerbez. Sälamätlek, uñışlar häm bäxet yuldaş bulsın!» - dip belderde Röstäm Nurgali ulı Miñnexanow.