«Sälät-Yar-Çallı» sälkeşe – Balalar ewrowidenieseneñ yarımfinalı ciñüçese ← kire kaytirga

Sälät berläşmäsenä Rafael Gıylmuraxmanow 2016-nçı elda kilgän. Äybät ukuı häm mäktäbeneñ icadi çaralarına üz öleşen kertkäne öçen anı «Sälät-Yar Çallı» alanına putewka belän büläklägännär. Rafaelneñ portfoliosına härkem kızıgırlık! Anıñ arsenalında respublikaküläm, bötenräsäy häm xalıkara bäygelärdä 50-dän artık maktau gramotası bar. Alar arasında Bötenräsäy açık balalar  estrada telewizion «Zolotoy petuşok» bäygese (finalist), Xalıkara wokal «Zolotoy golos» festiwal-bäygese (Mäskäü, 2013-nçe el, 1-nçe urın), wokal-xor başkaruında Xalıkara katnaşulı II Bötenräsäy «Odarennıe deti Rossii: zolotıe golosa» festiwal-bäygese (2015-nçe el, 2-nçe urın), h.b. da bar.

2013-nçe elnıñ fewralendä Rafael «Sälätle bala» isemen, «Buduşçee Rossii» geroe medalen algan, «Odarennıe deti – buduşçee Rossii» entsiklopediyasenä kertelgän. 2015-nçe elda çıkkan «Tworçeskie i sportiwnıe deti mira» entsiklopediyasendä dä (1-nçe tom) Rafaelneñ isemen taba alasız.

Berençe tapkır Bötenräsäy «Balalar ewrowideniese» bäygeseneñ yarımfinalında Rafael 2013-nçe elda ciñgän. Yaş aktiwistıbıznıñ uñışları belän bez dä kızıksındık.

-         Rafael, Balalar ewrowideniesenä niçek kilep eläkteñ?

-         Min sälätemne üsterü, üzemne kürsätü digändä ber mömkinlekne dä kuldan ıçkındırmaska tırışam: här bäygedä diyarlek katnaşıp kiläm. «Balalar ewrowideniese» bäygeseneñ yarımfinalındagı uñışımnı üzemneñ berençe citdi ciñüem dip sanıym. Barısı da şunnan başlanıp kitte. El saen cırlar yazdırabız, ciñügä ömetlänäbez.

-         Älege bäyge niçek ütte?

-         Bäyge Mäskäüdä, Igor Krutoynıñ Populyar muzıka akademiyasendä ütte. Onıtılmaslık häm kabatlanmas bäyge buldı ul.

-         Nindi cır belän çıgış yasagan ideñ?

-         Yaş kompazitor häm cırçı Mona-Nava Romova-nıñ (Mäskäü şähäre) «Poy so mnoy» dip ataluçı cırın täkdim ittem.

-         Köndäşlek zur bulgandır inde...

-         Berniçä meñ gariza birgännär arasınnan nibarı 49 keşe genä yarımfinalga ütte. Bu fakt üze minem öçen zur ciñü. Äle alar arasında kübese Populyar muzıka akademiyaseneñ häm Mäskäüneñ küp kenä prodyuserlık üzäkläre ukuçıları.

-         Jyurida kemnär bar ide?

-         «Golos 4» şouı katnaşuçısı Konstantin Rabotow, kompozitor Rita Dakota häm Igor Krutoy Akademiyaseneñ ukıtuçıları.

-         Sineñ uñışlarıñ belän barlık Sälätlelär gorurlana! Ä sineñ öçen Sälät närsä ul?

-         Sälätne min el däwamında kötep alam. Sälät ul – yal, duslar, ul – şatlık xisläre, yaña kiçreşlär, aralaşu, ul – gailä, küñelneñ türendäge oeşma. Sälät belän tanışkançı iñ zur xıyalım bulıp «Golos. Deti» şouına kasting ütü tordı. «Sälät-Yar-Çallı»da yal itkännän soñ bu xıyalım kiñräk üseş häm mägnä aldı. Ikençe elga bik «Sälät-Monreal»gä barasım kilä. Monıñ östendä inde eşli başladım: ingliz telen tiränten öyränäm. Älegä yaratkan alanımda yal itäm.

-         Bezneñ ukuçılarıbızga teläkläreñ?

-         Çıgarılış sıynıf ukuçılarına imtixannarnı uñışlı tapşırıp, telägän uku yortlarına kerülären teläp kalam. Äti-änilärebezgä – tüzemlek, balalarga – tirä-yundägelärne añlauların telim. Barıgızga da sälamätlek, uñışlar häm ak bäxetlär!

-         Räxmät siña! Aldagı könnäreñdä dä gel uñışlar yuldaş bulsın! «Sälät-Yar Çallı»da yaña ürlär yaularlık köç cıep kayt!