«Sanak-lab» IT-dönya belän tanıştıra! kire kaytirga

«Sanak-lab» IT-dönya belän tanıştıra!

Bu könnärdä Sälät Yortında ber-ber artlı törle proektlar start ala. Äytik, şimbä könne «Sanak-lab» uku-ukıtu laboratoriyaseneñ açık işeklär köne uzdı. Kem anda buldı – laboratoriya belän yakınnan tanıştı inde. Ä kem äle «Sanak-lab» belän tanışırga ölgermäde – älege yazma sezneñ öçen.

Bez «Sanak-lab» uku-ukıtu laboratoriyaseneñ citäkçese Läysän Sabitowa belän söyläştek.

– Läysän, açık işeklär köne niçek uzdı?

– Açık işeklär könendä laboratoriya eşçänlege turında söylädek, programma häm ukıtuçılar belän tanıştırdık, berençe tapkır mitap uzdırdık – anda ike spiker «Python häm anı kullanu ölkäläre» häm «Böten keşelär öçen dä uennar uylap tabu! Yaki ni öçen geymdew – ul äle programmalaştıru gına tügel?» digän temalarga çıgış yasadı. Şulay uk Kahoot uenı buldı, anda ciñüçelärne büläklädek.

– Älegä «Sanak-lab» proektı belän tanış bulmauçılar da bardır. Äydä şularga laboratoriya turında söyläp kit äle!

– Sanak – kompyuter digän süz. Añlagansızdır inde, «Sanak-lab» – mäglümati texnologiyalär dönyası belän tanıştıra torgan proekt. Iskitkeç zur häm kızıklı dönya bit ul IT! «Sanak-lab» laboratoriyase – mäktäp ukuçıları öçen el däwamında ütä torgan kızıklı däreslär ul.

Yunäleşlär bik küp:

- programmalaştıru buença olimpiadaga äzerlek;

- Python-da programmalaştıru nigezläre;

- kompyuter lingwistikası häm söyläm texnologiyaläre;

- Web-eşlänmälär;

- 3d-modelläşterü;

- informatika buença BDIga äzerlek;

- robotlar yasau texnikası;

- kompyuter dizaynı;

- wideomontaj;

- fotosängat.

Däreslärne Tatarstannıñ iñ yaxşı studentları, aspirantları häm belgeçläre alıp bara.

Laboratoriyadä 12-18 yaşlek ukuçılar katnaşa ala. Uku – oktyabrdän mayga kadär. Şulay uk küçmä sessiyalär dä oeştırıla.

– Laboratoriya inde 3 el eşli. Şuşı wakıt eçendä nilär eşlände – kıskaça gına näticä yasap al äle.

– 3 el eçendä 7 küçmä sessiya uzdırdık, laboratoriyadä 100dän kübräk ukuçı belem alıp çıktı, şulay uk 5-9-nçı sıynıflar öçen programmalaştıru buença berençe Respublikaküläm olimpiada ütkärdek.

– Ä bu elga plannarga kilsäk...

– Bıel planda – 3 küçmä sessiya uzdıru, şulay uk programmalaştıru buença olimpiadanıñ masştabların zuraytu. Bıel wideo montajlau häm fotosängat buença kıska intensiw kurslar kertep cibärdek. Ukuçılarga kızıklı bulır dip uylıybız. Däreslär raspisaniese belän bezneñ «WKontakte» törkemebezdä tanışırga mömkin – vk.com/sanaklab .

Bezgä kuşılırga teläüçelär öçen sıltama: https://clck.ru/Ee7iQ .