Sälätçelärneñ «urmandagı» irtänge aşı ← kire kaytirga

Kiçä tatar telendäge «Bezneñ fiker» debatlar Ligası ciñüçeläre häm «Sälät WikiMäktäbe» finalistları Kazannıñ «Gorki-Ämät urman parkı»nda Kazan şähären parkları häm skwerları Direktsiyase citäkçese Alsu Säetowa belän irtänge aşta oçraştı.

Oçraşuda «Sälät» Fondınıñ başkarma direktorı Timur Söläymanow, «Sälät» Yaşlär üzäge direktorı Aygöl Gabdraxmanowa häm «Sälät» Klubı Prezidentı Igor Smirnow ta katnaştı.

«Balalarnıñ minem belän oçraşasıları kilgänen belgäç, çak kına egılmadım. Yarıy äle utırıp tora idem (kölä). Bu oçraşuga çakıru alu minem öçen bik küñelle häm räxät buldı. Timur Söläymanow äytkänçä, bez äle üzebez dä kızıklı şäxeslär belän oçraşuga yörise kilä torgan yaştän ällä ni erak kitmädek. Üzebez dä şul oçraşularga kilgän keşelärneñ urınında bulırga xıyallana idek», – dip büleşte Alsu Säetowa.

Oçraşunıñ räsmi çaraga oxşamawı häm ciñel uzuı balalarga açılırga, oyalmıyça soraular birergä häm oçrşunıñ töp temasına bäyle fikerlären äytergä yardäm itte.

Oçraşunıñ töp teması Kazan şähäreneñ parkları belän bäyle ide. Bik azlar gına başkalabızda 126 park buluın belä. Näk menä Alsu Cäetowa häm anıñ iñ osta belgeçlär komandası «Gorki-Ämät urman parkı», «Çerek kül» parkı, «Lyadskoy sad», «Ermitaj» häm tagın başka bik küp parklarnıñ iminlegen kaygırta häm kamilläşterü belän şögıllänä. «2016-nçı el azagında açılgan «Gorki-Ämät urman parkı» urınında, mäsälän, general plan buença yul tözelergä tieş ide. Aktiwistlar häm çañgıçılar bu 2 keçkenä urmannı saklap kalu öçen köräşep ciñep çıktılar häm xäzer, menä, biredä bik matur park açıldı. Nibarı 11 ay eçendä tulı kanlı park barlıkka kilde. Älege mäydançıknı eksperimental dip tä äytä alabız. Çönki biredä “DOM” Ekoüzäge tözelde. Bu yallarda “DOM” karşında berençe cämägat bakçası da açılaçak. Böten telägän keşe kilep pomidor, yaşelçälär utırta ala. Çit illärdä mondıy

praktika küptännän küzätelä inde. Bezgä äle yañarak kına kerep bara. Tatarstanda berençelärdän bulıp bu eşne başlap cibärüebezgä çiksez şatbız», – dip söyläde Direktsiya citäkçese.

Oçraşu barışında sälätçelär «Çerek kül» parkı belän bäyle yañalıklarnı da beldelär. Bu cäydä «Çerek kül»dä Adiliya häm Zigfrid isemle akkoşlar barlıkka kiläçäk ikän.

Irtänge aş däwamında balalar Alsu xanımga kızıklı soraular birdelär, üz fikerlären äytergä kurıkmıyça, räxätlänep söyläşep utırdılar.

Läysän Miñnullina, «Bezneñ fiker» proektı citäkçese:

– Döresen genä äytkändä, mondıy Büläk-oçraşu-irtänge eşlekle aş formatı bezneñ öçen yañalık tügel inde. Mondıy format üzenä kürä goref-gadätkä äylänep bara. Malaylar häm kızlarnıñ şundıy şäxeslär belän ber östäl artına cıelıp söyläşä aluları, şundıy mömkinlek barlıkka kilü bik kuanıçlı. Älbättä, oçraşudan soñ bulgan xis-kiçereşlärne äytep-añlatıp beterep bulmıy. Minem küñelne barı şatlık bili. Kunaklar kitep, balalar taralışkaç ta, bez komanda belän östäl artında kalıp söyläşüne däwam ittek häm parkka koyaşlı, cılı könne kilep räxätlänep yal itärgä süz kueştık.