Sälätlelär Räsäy Prezidentı kotlawı belän ilhamlandılar ← kire kaytirga

Kiçä, Kazanda «Wmeste wpered» dip isemlängän  studentlar klublarınıñ  mägarif forumı tämamlandı.

Biredä, Räsäyneñ 38 töbäklärennän studentlar katnaştı. Alar arasında Sälät proektları wäkillären dä küzätep buldı. Tämamlanu çarası bulıp Bötenräsäy studentlar könenä bagışlangan bäyräm kontsertı uzdırıldı.  Älege zur bäyrämdä Tatarstan Respublikası Prezidentı Röstäm Nurgali ulı Miñnexanow ta katnaştı. Eş belän ike köngä başkalabız Kazanga kilü säbäple, barlık studentlarnı bäyräm belän Räsäy Federatsiyase Prezidentı Wladimir Wladimir ulı Putin da kotladı.

«Sezne, barlık studentlarnı, sezneñ ostazlarıgıznı, ukıtuçılarıgıznı Studentlar köne belän, çın küñeldän täbrik itäm! Sezgä, älbättä, iñ berençe çiratta, ukuıgızda häm kiläçäk tormışıgızda uñışlar telim! Barı tik studentlar bulganda gına Räsäy härwakıt yaş, kıyu, kiläçäkkä omtılış belän yaşäüçe bulıp kalaçak. Uñışlar sezgä! Sezne härwakıtta da alga omtılış belän karauçı, ilebezneñ barlık mömkinlekläre belän kullanuçı keşelär bulıp küräse kilä.  Sez – yaña zamanda üskän keşelär.

Şunı añlagız: sezgä kadärgä buın belän çagıştırganda östenlekläregez şaktıy kübräk. Xäzerge wakıtta sez irekle räweştä yaña sängat, moda, muzıka, texnologiyalär uylap taba alasız. Barı tik xatalardan kurıkmagız! Härwakıt alardan çıgu yulların ezlägez. Häm şul wakıtta gına, sez, çınnan da, bäxetle, uñışlı buın bulıp üsärsez! Ixlas küñeldän sezgä şuşı teläkläremne telim!» – dip üz kotlau süzlären tämamladı Prezident.

Sälätlelär atmosferaga birelep, tulaem çara belän ilhamlandılar.

«Üz uniwersitetımnan forumda katnaşır öçen gariza gına cibärdem. Telefonga şaltıratu kilgäç, Tatarstan Prezidentı yanında utıruçı top-32gä elägüem bilgele buldı! Läkin, min anıñ şul kadär ük yakın buluın küz aldıma da kitermägän idem! Älege oçraşu mine yaña maksatlarga ilhamlandırdı.  Yaşlärneñ kübese yaña proektlarga alınırga kurka, ä menä Wladimir Wladimir ulı Putin bezgä xatalardan kurıkmagız dip teläde. Şäxsän, min üzem, şul uk tönne başımda ällä kayçan yaşi torgan yaña fikeremne centekläp yazıp çıktım» – dip söyläde Ilsöyar Xismätowa.

«Älege çaraga bik nık elägäsem kilä ide! Nihayat, biredä, Saratowta yaşäüçe dus kızım belän küreşä aldım. Iñ başta, Wladimir Putin kilüen belmi idem. Läkin, anıñ säxnägä çıguı belän bäyrämneñ ähämiyatlegenä inandım. Bu bik şäp ide! » – dip üz xis-toygıları belän urtaklaştı Räzilä Sädriewa.