«Sälät ul – BEZ!» ← kire kaytirga

Bügen, 21-nçe iyundä, Bilärdä Xalıkara «Sälät» yaşlär uku-ukıtu foruımınıñ berençe smenası – SOFT SKILLS BILER FORUM başlanıp kitte.

Bilär cirlegenä barlıgı 1100 keşe cıeldı. Şularnıñ 780e – balalar. Alar – «Sälät-Tel», «Sälät-Ostalar bistäse» häm «Bolgar-Tugan tel» sälkeşläre. Berençe könne alar «Welcome tour» interaktiw uenı yardämendä forum cirlege belän tanıştı. Ä kiç belän forum programmasın täkdim itü häm «Sälät ul – BEZ!» digän çara uzdı.

Räsmi bulmagan açılışka Tatarstan yaşlär eşläre ministrınıñ berençe urınbasarı Timur Söläymanow ta kilgän ide. «Sälam, Sälät! Sälam, Bilär kalası! Sälam, Xucalar tawı! Sälam, Izge Çişmä! Bez – Bilärdä. Bez – Bilärle. Bilär – Sälätle. Sälät Bilärgä kaytuın däwam itä. 8-nçe forumnı başlap cibäräbez!

Karagız nindi matur şähärçek tözelde. Ul bezneñ komandabız yardäme, Tatarstan Prezidentı Röstäm Miñnexanow, Yaşlär eşläre ministrı Damir Fättaxow häm, älbättä, Sälät proektları citäkçese Ädip Älmir yardäme belän tözelde», – dip sälamläde ul sälkeşlärne.

Forum programması üz eçenä törle formattagı belem birü çaraların – profil laboratoriyalär, sport-küñel açu, icadi mäydançıklarnı ala. Ostaxanälär, tanılgan ekspertlar belän oçraşular belän berrättän, törle ölkälärdä (fän, sängat, eşmäkärlek) uñışka ireşkän yaşlärneñ unikal täcribäse häm alarnıñ uñış tarixları belän urtaklaşu sessiyaläre planlaştırılgan.