Äle kiçä genä Sälätneñ 20 ellıgın bilgeläp ütkän kebek idek. Menä tagın 5 el sizelmi dä ütep kitkän. Bıel Sälätneñ 25 yaşlek tugan könen bilgeläp ütäbez.
Yubiley uñaennan bäyräm çaraları fewral aenda «Sämrux» el premiyase tantanasında başlanıp kitkän ide. Ä 3-nçe apreldä Sälättä räxmät kiçäse uzdı. Sälätne buldıruga, üsterügä üz öleşen kertkän fikerdäşlärgä, duslarga, ostazlarga, «sälät»lelärgä räxmätebezne belderdek.
«Sälät» Yaşlär üzäge direktorı Aygöl Gabdraxmanowa Ädip Älmirdän sälam citkerde. «Sälät 26-nçı sezonın başlıy. 1994-nçe elda Arçada 65 bala katnaşında başlanıp kitkän Sälät xäräkäte bıel üz kanatı astına 25 meñ balanı cıyaçak», – dip bilgeläp ütte ul. Bıelgı cäy dä bik kızu bulaçak – barlıgı 23 alan, Bilär cirlegendä 6 Xalıkara forum kötä bezne!
Çaraga Tatarstan Respublikası Däülät Sowetı Räise urınbasarı Rimma Atlas kızı Ratnikowa da kilgän ide. «Zalga kergäç, yaşlär kayda soñ, dip toram. Zalda ostazlar, täcribäle keşelär utıra. Ä yaşlär bieklektä ikän. Şulay tieş tä bezdä», – dip, iñ elek balkonda utıruçı sälätle yaşlärne sälamläde ul. 
«Sälätne berençe ellarınnan uk beläm. Cäüdät Şäükät ulınıñ bezne ideyaläre belän tanıştırıp, alarnı bezgä dä señderep söyläp yörgän çakları küz aldımda. Ul ideyadän şuşındıy zur masştablı aktual xäräkät üsep çıgar dip küz aldına da kiterä almıy idek. Sälät miña bik oşıy. Sezneñ belän elemtäne özmäskä tırışam. Min üzemne bik bäxetle keşe dip sanıym, çönki sezneñ belän aralaşam, sezdän energiya alam. Tatarstan yaşlären üsteräse kilä, kiläçäktä ul yaşlärebez Tatarstannı üsteräçäk bit», – dip söyläde Rimma Atlas kızı.
Tatarstan Respublikasınıñ Yaşlär eşläre ministrınıñ berençe urınbasarı Timur Cäüdät ulı Söläymanow: «Sälät Yortına kilmibez, Sälät Yortına kaytabız. Monda utıruçılar – kunaklar tügel. Bu sezneñ üz yortıgız. Bez anı sezneñ belän bergäläp tözedek. Bügen bez Sälätneñ 25 ellık eşçänlegenä näticä yasaunı däwam itäbez. Bu el däwamında bik küp räxmät süzlären äyterbez, näticä yasaunı da däwam itärbez. Läkin ul näticälärneñ iñ möhime, minemçä, bezneñ zur Sälät gailäse häm menä şul Sälätne üstergän fikerdäşlär, oeştıruçılar, ostazlar», – dip bilgeläp ütte.
Tatarstan Respublikası Mädäniyat ministrı urınbasarı Damir Danil ulı Natfullin: «25 el eçendä Sälät dönyası nindi yugarı däräcägä üsep citte. Säxnägä karasañ da, telewizorga karasañ da – här cirdä Sälättän çıkkan yaşlär. Alar bezneñ mädäniyatne üsterügä zur öleş kertälär. Şunıñ öçen sezgä zur räxmät», – dip räxmät süzlären citkerde.
Tatarstan Respublikası fän häm mägarif ministrlıgınıñ milli mägarif idaräse başlıgı Liliya Mars kızı Äxmätcanowa Sälätne bal belän çagıştırdı. «Sälät – bal kebek, böten keşene dä üzenä tarta torgan oeşma», – dide. Süz uñaennan, anıñ kızı Güzäl Äxmätcanowa da «Sälät»neke. «Sämrux-2018» el premiyasendä el ölkän äydamanı bulıp tanıldı. 
Gomumän, bu kiçtä räxmät süzläre bik küp äytelde, räxmät xatları tapşırıldı. «Räxmät ul berkayçan da artık bulmıy. 25 el bue şuşı Sälät dönyasın üsterügä üz öleşen kertüçelärgä räxmät. Bu xalık isemennän räxmät digän süz. Çönki Sälät – ul tatarlıknı saklau, ul bezneñ telebezne saklau, respublikabıznı yaklau, ul kiläçäk buınnarnı respublikabız belän idarä itü öçen äzerläü», – dip söyläde Tatarstan Fännär akademiyase akademigı Indus Rizak ulı Tahirow.