«Sälät-Monreal»: näticälär, fikerlär, kiläçäkkä plannar ← kire kaytirga

12-nçe awgust könne Kanadada berençe Xalıkara «Sälät-Monreal» profille smenası tämamlandı. Lager Tatarstan Respublikası Prezidentı Röstäm Nurgali ulı Miñnexanow teläktäşlege häm yardäme belän ütkärelde.

«10 kön küz açıp yomgançı uzıp kitte. Här katnaşuçı – unikal şäxes. Törle illär, törle şähärlärdän cıelgan bulsak ta, ber gailä şikelle tatu yaşi aldık. Bu zur yulnıñ başı gına. Däwamlı bulsın! Çittä yaşäüçe millättäşlärebezne Tatarstanda kötäbez!» – dip belderde Aygöl Gabdraxmanowa.

Sälät yortında yartı el däwamında, söyläşülär formatında saylap alu turları bardı. Tatarstannan 200 kandidat arasınnan iñ-iñnäre dip sanalgan 20 bala saylap alındı.  

«Inde küptännän äydaman bulıp eşlägänem yuk ide. Şuña da bik kızıgıp kildem. Biredäge sälkeşlär üz balalarım şikelle kaderle. Sälätle buluları belän cälep itä belälär. Alan betügä karamastan, aralaşıp yaşärgä yazsın. Bez äle «Sälät-Monreal» klubın buldırırga tieş!» – di Ilsöyar Xismätowa.

Alannıñ programmasında Kanada, Çexiya häm AKŞtan 60 keşe katnaştı. Kanadada proektnıñ kuratorları häm initsiatorları bulıp Sälät weterannarı – Alimä häm Marat Säläxetdinowlar tordı.

«Küptänge urtak xıyalıbıznı tormışka aşırdık! Xäzer Sälät Amerika kontinentında da çäçäk ata. Sälätle balalar häm yaşlärgä kiräk bulgan missiyabezne däwam itä aluıbızga çiksez şatbız!» – dip skayp aşa Alimä Säläxetdinowa citkerde.

Lagernıñ programması katnaşuçılarnı tatar mädäniyate, sängate belän tanıştıra, milli köylär, cır-biyulär aşa goref-gadätlär, traditsiyalärne yañarta. Smena barışında balalar kurayda uynarga öyrändelär, Sabantuyda katnaştılar, icadi kontsertlar kuydılar. Şulay uk alan kısalarında, Sälät smenalarına xas bulgança, uku-ukıtu çaraları, intellektual uennar uzdı.

«Sälät ul – Tatarstan digän süz tügel. Kanada digän süz dä tügel. Sälät ul – bez. Ike sälkeş bar ikän – bu inde alan digän süz. Alar palatkada da, iñ şäp oteldä dä Sälät buldırırga sälätle. Bez kayda – Sälät şunda bulsın!» – dip teläde Yoldız Miñnullina.

Smenanıñ iñ keçkenä katnaşuçısına nibarı 3 yaş bulganlıktan, «Sälät-Bäläkäç» klubı da aktiw eşläde. Kön saen Kanadanıñ törle poçmaklarınnan 2-3 gailä balaların «Bäläkäç» klubına alıp kilep tugan telebezne, mädäniyatebezne öyrätkän.

«Küñeldä ike törle xislär: ber yaktan şatlıklı, ikençe uylasañ – moñsu. Gadättä, berençe äydaman onıtılmıy. Biredä min sälkipüşlärgä berençe äydaman rolen ütäwem belän bik gorurlanam. Alga taba sälkeş rolendä Sälätkä kilergä yazsın sezgä! Tüşegezne sarı galstuk bizäsen!» –  dip teläde «Sälät-Monreal»dä «Bäläkäç» klubı kuratorı Alisä Camaliewa.

«Härberegezgä dä zur räxmät! «Sälät-Monreal»dä cırlamagan sälkeş kalmadı. Ostaxanä yörmäüçelär dä kuşılıp kitep, gel-gel cırlap yördek. Fortepianoga da tıngı bulmadı. Minem cırçı küñelemdä härberegezneñ tawışı kaldı, moñı kaldı. Räxmät!» – di Läysän Äsxätowa-Arsentewa.

Bügen, yagni 15-nçe awgust könne, Sälät yortında Xalıkara «Sälät-Monreal» profille smenasına yomgak yasau buença press-konferentsiya uzdı. Çarada Tatarstannan häm Kanadadan smenada bulgan oeştıruçılar häm katnaşuçılar da bar ide. Jurnalistlar üzlären kızıksındırgan soraularga cawap taba aldılar.