Bu elnı iñ möhim nominatsiyalärneñ berse «El alanı»nda ciñüçe – «Sälät-Sanak» ← kire kaytirga

«Sämrux-2017» el premiyasendä ciñü, kiläse alan öçen bik kötelgän ide! Bu elnı iñ möhim nominatsiyalärneñ berse «El alanı»nda ciñüçe – «Sälät-Sanak». Älege ciñüne närsä añlatkanın bezgä smena direktorı Läysän Sabitowa söyläp birde.

- Sineñ öçen Sälät ul – …

- Sälät ul – duslar, yaratkan eş, üz östeñdä eşläü, icat belän şögıllänü mömkinlege. Sälät ul – garmoniya, bäxet xise häm balalar!

- «Sälät-Sanak»ta närsä belän şögıllänäseñ?

- Sälättä min 2015-nçe eldan başlap «Sälät-Sanak» smenası direktorı rolen, 2016-nçe eldan «Sanak-lab» belem birü laboratoriyaseneñ citäkçese wazıyfasın başkaram.

- Bezneñ oeşmadan tış, närsä belän şögıllänäseñ?

- Bügenge köndä «BARS Grup» IT-kompaniyasendä eşlim, säyaxät itärgä, smenam öçen yaña ideyalar uylap tabırga yaratam.

- Sineñ Sälättäge töp kazanışıñ?

- Balalarımnıñ xäzerge wakıtta tekä äydamannar buluı. «Sälät-Sanak»nıñ balalarına mäglümati texnologiyalärgä karata mäxäbbät uyatu, üseş öçen mömkinlek birü. Balalarga tormışta döres yunäleş birüdän kala, alarga unikal belemnär täkdim itäbez. Älege belemnär yardämendä küp kenä sälkeşlärebez IT yunäleşendäge Yugarı belem birü uku yortlarına ukırga kerälär.

- Sineñ öçen «Sämrux» ul – ...

- Üz eşçänlegeñä östämä analiz, yomgak yasau, üsü öçen yaña wektorlar tabu.

- «Sämrux» premiyasendä ciñer öçen nindi 3 sıyfatka iya bulırga kiräk?

- Miña kalsa, ciñü öçen barı tik 3 sıyfatka gına iya bulu, berniçek tä, citmi. Minemçä, bu şäxsi teläklär, tışkı faktorlar, wakıt häm urınnıñ oçraşu noktası. Şunısın tögäl äytä alam, älege ciñügä komandanıñ härber wäkile üz öleşen kertte: äydaman, sälkeş, ukıtuçı h.b.

Bu – bezneñ urtak ciñüebez! Komandama mäxäbbät, ışanıç, kızıklı eşkä üz öleşlären kertkän öçen min çiksez räxmätlemen!

- Ciñüne kötkän ideñme?

- Ul kötelgän ide. Şunı äytä alam.

- Sin katnaşkan nominatsiyadä sinnän tış tagın kem ciñä alır ide?

- Barlık alannar da üzençälekle, läkin min ciñüne «Sälät-Aznakay»ga tapşırır idem. Alar köçle küñel-açu, belem-birü programmasına, berdäm komandaga, töptän uylanılgan sistemaga iya. «Sälät- Aznakay» – afärin! Min ışanam, alarnıñ ciñüe häm tanıluı äle alda!

- Üzeñ turında söyläp kit.

- Min – matematik häm xıyalıy keşe.

- Kiläse elda «Sämrux»ta katnaşuçılarga närsä telär ideñ?

- Üz eşegezdän läzzät alıgız!