Sälät mäktäpkäçä yaştäge balalar belän dä eşli ← kire kaytirga
Sälätneñ berençe sälkeşläre inde küptän üsep, üzläre äti-äni bulsalar da, alarnıñ Sälättän aerılasıları kilmi. Balaçakların, yaşleklären sagınıp, küp kenä «Sälät» weterannarı el saen Bilärdäge forumga kilä. Üzlären küp närsägä öyrätkän Sälät ruxı keçkenädän señä torsın dip, näni balaların da biregä alıp kilälär.
Äti-äniläre sälkeşlär belän master-klasslarda täcribäläre belän urtaklaşkanda, sabıylar wakıtların buşka ütkärmi. Alar xalıkalara yaşlär uku-ukıtu forumı kısalarında oeştırılgan «Bäläkäç» mäydançıgında wakıtların bik faydalı häm kızıklı itep ütkärälär: räsem yasıylar, tatarça multfilmnar karıylar. Uynap arıp, yokısı kilgännärgä yomşak mendärlär dä bar monda. Tösle räsemle kitaplar, matur uençıklar da bik küp.
«Bäläkäç» proektnıñ kuratorı – Alsu Salawatowa, ä koordinatorı – Güzäl Xäsänowa. Alar balalarnıñ köne faydalı häm küñelle ütsen dip, kön tärtiben kızıklı itep tözegännär. Sälät alannarındagı kebek, «Bäläkäç»tä däreslär dä bula. Älbättä inde, alar uen formasında bara. Nänilärgä biredä bik oşıy. Proektnıñ maksatı – balanıñ potentsialın üsterü, anı şäxes itep tärbiyaläü öçen şartlar tudıru.
«Bäläkäç» proektı üz eşçänlegen 2013-nçe elda başlap cibärde. Soñgı ike elda el däwamında älege proektnı Sälät Yortında «Bäläkäç» klubı formatında alıp barabız. Şimbä saen balalarnı cıep, törle ölkälärdä däreslär uzdırabız. Şulay uk «Bäläkäç» proektı xalıkalara yaşlär uku-ukıtu forumı kısalarında da oeştırıla. Monda bez balalar belän yal itäbez, räsemnär yasıybız, uennar uynıybız, uen formasında däreslär ütkäräbez. Ä uzgan el bez balalar belän säxnägä çıgıp, «Sälät– ul» cırın başkardık. Şulay itep balalar berençe tapkır üzlären säxnädä kürsättelär. Şulay uk «Sämrux» premiyasendä çıgış yasagan idek. Bezneñ «Bäläkäç» alanı da aktiw eşläp kilä. «Bäläkäç» alanın bez elga öç märtäbä «Fänsär» bazasında ütkäräbez. Anda bez balalar belän yal itäbez, törle çaralar ütkäräbez», – dip söyläde «Bäläkäç» proektınıñ kuratorı Alsu Salawatowa.
«Sälät» proektları citäkçese Cäüdät Söläymanow ta här könen «Bäläkäç» çatırına kerep, sabıylarnıñ xälen belüdän başlıy. Çönki «Bäläkäç»tä yal itüçe balalar – «Sälät»neñ kiläçäge.