«Sälät» Klubı Prezidentı Idel bue däülät fizik kultura, sport häm turizm akademiyasendä Sälät aktiwistları häm tatar tele buença Xalıkara olimpiada katnaşuçıları belän oçraştı. 
«Sälät» marafonı kısalarında, oçraşuga kilgän ukuçılarnı Sälät dönyası belän tanıştırdılar, alar öçen intellektual uen uzdırdılar. Ciñüçelär Sälättän istälekle büläklärgä iya buldı. 
Bu marafonnıñ maksatı turında bezgä «Sälät» Klubı Prezidentı Igor Smirnow häm berläşmä aktiwistları söyläde. 

Igor Smirnow: 

– Bu intellektual uen bezneñ berläşmägä tatar telen yaxşı belgän, xalıkara häm başka olimpiadalarda katnaşa torgan balalarnı cälep itü maksatınnan uzdırıla. Küplär inde belä: bezneñ berläşmäneñ belem birü kiñlege bar. Anda kilep kuşılgan balalar yaña belem tuplıy, tanışları sanın arttıra h.b. 

Liya Kogan, Sälät aktiwistı: 

– Zamana yaşläre öçen mondıy çaralar bik faydalı dip uylıym min. Alar yaşlärne intellektual yaktan üsterü, alarda intellektual uennarga karata kızıksınu uyatu häm Sälät dönyası belän tanıştıru maksatında oeştırıla. Kwiz – bik kızıklı intellektual uen, anda döres cawapnı tabu öçen, başnı eşlätergä kiräk. «Närsä? Kayda? Kayçan?» uenınnan aermalı bularak, monda öç tur bar häm här tur üzençälekle. Berençese – grafik, ikençese – «Närsä? Kayda? Kayçan?» tibındagı soraular, öçençese – muzıkal tur. Min oeştıru eşendä bulışıp yörergä, öleşemne kertergä yaratam. Şul räweşle täcribä tuplıym, keşelär belän yaxşırak aralaşırga öyränäm.