SOFT SKILLS BILER FORUM başlandı! kire kaytirga

SOFT SKILLS BILER FORUM başlandı!

Bügen, 22-nçe iyundä, SOFT SKILLS BILER FORUM-nıñ räsmi açılu tantanası uzdı.

Tantanada märtäbäle kunaklar da katnaştı.

Tatarstan Respublikasınıñ yaşlär eşläre ministrınıñ berençe urınbasarı Timur Söläymanow: «Menä tagın Bilärgä kayttık! Şuşı cirneñ, babalarıbıznıñ köçen toep, anı cirdän, izge çişmädän, Xucalar tawınnan alıp, şul köçne toep yaşik. Bez monda bulganda, Bilär – Sälätle, Sälät Bilärle bulganda, bezneñ kiläçägebez dä ömetle. Sezneñ kebek sälätlelär bulganda, Tatarstanıbız üsäçäk. Prezidentıbız Röstäm Nurgali ulı, yaşlär eşläre ministrlıgı, Alekseewsk rayonı komandası yardämennän başka, bolarnıñ berse dä bulmas ide!» – dip sälamläde.

Alekseewsk rayonı başkarma komitetı citäkçese Nail Kadıyrow:

«Bu forumnı oeştıruçılarga räxmätebezne belderäbez. Rayon başlıgı isemennän, sezgä yaxşı yallar, uñışlı forumnar telibez», – dip çıgış yasadı.

Bilär awıl cirlege başlıgı Galim Xäbibullin: «Bıel Bilär cirlegendä 23-nçe tapkır cıelabız. Min berençe könnän sezneñ belän. Berençe ellarda 20 bala bula ide, ä xäzer bişär meñ bala cıela», – dip istäleklären yañarttı.

Açılu tantanasına Ak Bars Banknıñ talantlarnı üsterü üzäge direktorı Aleksandr Xämätcanow ta kilgän ide. «Min sezgä bik kızıgam. Çönki bez bala çakta mondıy forumnar yuk ide. Bank bularak, bez bulaçak klientlarıbıznıñ belemle buluın telibez. Şuña kürä forum eşçänlegendä bik teläp katnaşabız», – dip bilgeläp ütte ul.

Tantana azagında aktiwistlar Räsäy, Tatarstan, Sälät häm forum älämnären kütärde.