Spikerlar sälkeşlärgä belem serlären aça ← kire kaytirga
IT BILER FORUM-ınıñ uku-ukıtu programması däwam itä. Forumnıñ dürtençe köne kızıklı äñgämälär häm küñelle oçraşular belän istä kaldı.
Tärcemäçe, xalık aldında çıgış yasau buença konsultant Tahir Nasibullin sälkeşlärgä süz tılsımı turında söyläde, säxnädä üz-üzeñne irken totu kagıydälären äytep ütte. «Süzneñ tılsımı bar ikänenä ışanu öçen, ni äytkäneñne uylap eş itärgä kiräk. Äytik, siña iñ kıymmätle ayfon kiräk, di. Akçaları buluga karamastan, ätieñ dä, änieñ dä moña riza tügel. Şulçak sin alarga: «Äni, ägär min yugalsam, sin mine taba almayaçaksıñ, ä şul telefon bulsa, mine ezläp tabu mömkinlege zurrak bulır ide», – disäñ, alar bu turıda uylanırga mömkin, çönki alar öçen iñ möhime – balasınıñ sälamätlege. Dimäk, baş belän eş itsäñ häm süzläreñneñ mägnäsen belep söyläşsäñ, telägeñä ireşerseñ», – dide ul.
«Üz akkauntıñda populyarlaşasıñ kilsä, fayda häm emotsiya belän eş it. Sin yaza torgan post yaki sin töşerä torgan storislar härwakıt faydalı bulırga tieş. Ä fayda kiterü öçen emotsiyaneñ buluı da kiräk», – dip añlattı populyar bloger, marketolog Alinä Gimaltdinowa. Anıñ fikerençä, bloglarda uñışka ireşü öçen zur akçalar tügärgä kiräkmi, çönki populyar bulunıñ başka ısulları da bar. Mäsälän, sotsial çeltärlärgä kertä torgan postlarıñda populyar blogerlarnı bilgeläü, kızıklı xeşteglar kuyu da uñış kiterä ikän.
«Rossiya-1» telekanalında bara torgan «Udiwitelnıe lyudi» tapşıruında katnaşkan, «Tiz uku» häm «Iñ yaxşı xäter» kursları awtorı Wasiliy Zaxarow sälkeşlärne tiz arada küp mäglümatnı istä kaldıru serlärenä öyrätte. Monıñ öçen xäterläp kalırga kiräkle predmetlarnıñ obrazın tudırırga kiräk. «Bezdä – operatiw xäter. Bügen närsäneder istä totabız, ä irtägä onıtabız. Nindi ısullar belän mäglümatnı xäterdä kaldırıp bula soñ? Monıñ öçen lokatsiya metodı yardämgä kilä. Kayda närsä urnaşkanın belü, predmetlarnı yaki kitaptagı süzlärne küz aldında kaldıru bezneñ xäterebezdä ozagrak saklana», – dip belderde ul.
«Bügenge könne robotlardan häm robot texnikalarınnan başka küz aldına kiterep bulmıy. Bügen ük kul-ayakları yörmägän keşelärgä törle protezlar kiertälär, ä bolar – şul uk robotlar. Şulay bulgaç, alga taba robotlar tormışnıñ barlık ölkälärenä dä keräçäk», – dip başladı süzen ITIS studentı Aufar Zäkiew. Ul sälkeşlärgä robotlar turında kızıklı mäglümatlar birde, törle illärdäge robot texnologiyaläre belän tanıştırdı. Ekrannarda kürsätelgän robot wideoları sälkeşlärne tañ kaldırdı.
Sälkeşlärne döres maksat kuyarga häm şuña ireşergä «Fabrika Deti» dip isemlängän belem birü kursı citäkçese Yana Woznyuk öyrätte. Ul balalarga maksatka ireşü yulı turında söyläde. «Maksatnı küktän alıp kuyarga kiräkmi. Bu oçrakta yaşeñ häm üz mömkinlekläreñ turında uylarga kiräk. Ägär siña 12 yaşeñdä ike katlı yort kiräk ikän, sin döres fikerlämiseñ. Üzeñ ireşä alırday maksat kuep, burıçlarnı bilgelärgä häm üz tırışlıgıñ belän telägeñä ireşergä kiräk», – dip belderde ul.