Sälät forumınıñ berençe smenasına yomgak yasaldı ← kire kaytirga

16-nçı iyul könne VI Xalıkara yaşlär uku-ukıtu Sälät forumınıñ yabılu tantanası uzdı. Bilär muzey-tıyulıgı territoriyasendä 10-nçı iyul könne başlanıp kitkän Forumda, Tatarstan Respublikasınıñ barlık rayonnarınnan, Räsäyneñ distälägän töbäklärennän, yakın häm erak çit illärdän kilgän 5 500 sälätle bala katnaştı.

Forumnıñ töp kunagı bulıp, traditsiyagä äwerelgänçä, Tatarstan Respublikası Prezidentı Röstäm Nurgali ulı Miñnexanow tora.

«Barıgızga da xezmätegez öçen  räxmät! Eldan-el Sälät berläşmäse üsä. Xätta Respublikabızdan çittä dä tamır cäygänsez, çit ilgä kadär çıkkansız. Sezgä kiläçäktä dä teräk bulırga äzerbez. Sälamätlek, uñışlar häm bäxet yuldaş bulsın!» – dip belderde Röstäm Nurgali ulı Miñnexanow.

Respublikabız başlıgı berençe eş itep «Fänsar» fän häm mägarif üzäge eşçänlege belän tanıştı. Biredä «Ädip yortı» tözelgän ide. Annan ul uku-ukıtu mäydançıkları belän tanışıp çıktı, sälkeşlär belän aralaştı.

Forumnıñ töp teması bularak «4-nçe sänägat rewolyutsiyase kontekstında belem alu» yunäleşe saylanılgan ide.

Forumnıñ 1-nçe smenası kısalarında barlıgı 180 tematik uku-ukıtu mäydançıgı eşläde. Alar interaktiw oçraşular, diskussiyalär häm ostaxanälär formatında uzdı.

Sälät Forumınıñ programması uku-ukıtu texnologiyaläre belän tanışuga yunälderelgän ide. Älege protsessnı çınga aşıru kiläçäk buınnıñ hönäri orientatsiya, üzlektän belem alu instrumentları ölkäsendäge täcribäsen öyränügä kaytıp kala – HARD SKILLS, SOFT SKILL, DIGITAL SKIILS.

Çara eşçänlegendä 500-dän artık ekspertlar katnaştı: Räsäy Federatsiyase Däülät Dumasınıñ cidençe çakırılış deputatı Irek Zinnurow; Innopolis Uniwersitetınıñ ölkän fänni xezmätkäre Stanislaw Protasow, injener-ezlänüçe Wadim Reutskiy; Rus geografiya cämgıyate wäkilläre; Tatarstan Respublikasınıñ Fännär Akademiyase akademigı Fayaz Xucin; WRO tanıklıklı xökemdarı, MIDROID robototexnika mäktäbeneñ nigez saluçısı Mansur Şäfigullin; Proektlar belän idarä itü häm üsterü üzäge direktorı Ekaterina Egoşina, h.b.

Forum möxtäräm  kunaklarga da bay buldı:  Räsäy Federatsiyase Däülät Dumasınıñ Federal Cıelışı deputatı Marat Bariew; Tatarstan Respublikası Prezidentı Apparatı citäkçese Äsgat Säfärow; Tatarstan Respublikası Prezidentı yardämçese Nataliya Fişman; Tatarstan Respublikası Däülät sowetı räise urınbasarı Rimma Ratnikowa; Alekseewsk munitsipal rayonı başlıgı Wladimir Kozonkow, h.b.

Yalın Tatarstanda ütkärgän Räsäy telewideniese alıp baruçısı Janna Agalakowa da Forumda kunak bulıp kitte.

Forumnıñ tagın ber teması – «Ekologiya häm totrıklı üseş» dip atala. Ul art-obektlarda (çüpne aerım cıyuçı installyatsiyalär, elektr energiyase tabu öçen alternatiw ısullar, h.b. KGEU tarafınnan oeştırıldı) Totrıklı üseş maksatları uenında, Tatarstannıñ häm Räsäyneñ äydäp baruçı ekspertları, galimnäre belän tematik oçraşular barışında, hönäri ostalıklar laboratoriyase eşçänlegendä (JuniorSkills programması) açıldı.

2016-nçı elnıñ 1-nçe gıynwarınnan totrıklı üseş buença kuelgan 17 maksat üz köçenä kerde. Alar Berläşkän Millätlär Oeşmasınıñ tarixı sammitında dönyaküläm liderlar tarafınnan kabul itelgän ide. Alda torgan 15 el däwamında älege maksatlar ireşelergä tieş. Totrıklı üseş maksatları buença uen şuña bagışlangan ide.

Älege yunäleş buença töp näticä bulıp Prezidentıbız Röstäm Nurgali ulınıñ Bilär däülät muzey-tıyulıgınıñ üseş kontseptsiyasen xuplawı buldı. Anı Nataliya Fişman, KGASU häm Sälät berläşmäse wäkilläre täkdim itte.

Sälät Forumı kısalarında Sälät weterannarınıñ II Eşlekle forumı da uzdı. Ul üzendä berläşmäbezneñ törle ellardagı 100 katnaşuçısın berläşterde.

Forum kısalarında inde traditsiyagä äwerelgänçä «Bäläkäç» balalar klubı eşläde. Biredä Sälät xäräkäteneñ iñ keçkenä ägzaları tärbiyalänä. 2-7 yaş aralıgındagı balalar öçen teatr, muzıka, ingliz tele häm räsem sängate buença däreslär uzdırıldı. «Astan karaş» tapşıruı töşerelde.

Forumnıñ eşçänlege anıñ media-üzäge tarafınnan aktiw yaktırtıp barıldı. Anıñ kısalarında «Sälät  TV» telewideniesı, «Sälät  FM» radiosı görläde.

«Küñel tulı yaña xislär, yaña energiya. Yaña därt belän öygä kaytıp kitep, alga taba kiläçäkkä atlıybız. Bu bezneñ cirebez, bezneñ borıngı Bilärebez! Bez babalarıbız yulın laeklı däwam itärgä tieş! Kiläse oçraşularga kadär!» – dip saubullaştı «Sälät» Fondınıñ başkarma direktorı Timur Söläymanow.

Yabılu tantanasında iñ-iñnär büläklände, üzen aktiw kürsätkän oeştıru komitetı ägzaları aerıp bilgeläp ütelde.

«Barıgızga da zur räxmätemne belderäsem kilä. Sälkeşlärgä dä, äti-äniläregezgä dä, äydaman-başcitäklärgä, oeştıru komitetına. Onıtmagız: bergä bulganda gına bez köçle! Berdämlekne saklıyk! Sarı galstukka, şämäxä futbolkaga, törle däräcälärgä iya bulgannarnı kotlıym. Üzegezne härwakıt yaxşı yaktan gına kürsätergä tırışıgız. Bıel tege yaki bu büläkkä ireşä almagannar, käefegezne töşermägez: dimäk, äle üsärgä cirlek bar. Yugarıga omtıluçılarga bez yardäm itärgä äzer! Uñışlar sezgä!» – dip izge teläklären Sälät proektları citäkçese Ädip Älmir dä citkerde.

«Bez, härwakıttagıça, sezneñ kilüegezne zur tüzemsezlek xisläre belän köttek. Bar yaklap uñaylı yaşäü belän täemin itärgä tırıştık: fizik yaktan da, ruxi ölkädä dä. Tabigatneñ surätläp betermäslek maturlıgı, kabatlanmas Sälät moxite sezne yaña açışlarga häm ürlärgä ilhamlandırgandır dip ışanıp kalam! Forum tämam dip iglan itäsem kilmi. Sälät Forumı tämamlanmas, anıñ härwakıt däwamı bar, çönki ul däwam – sez – balalar. Eldan-el älege çara üsä, kiñäya. Härwakıt şulay bulsın! Ä bez häm Izge Bilär cire sezne 2-nçe smenaga da kötep kalabız!» – dip Alekseewsk rayonı başlıgı Wladimir Konstantin ulı Kozonkow kabattan çakırıp kaldı.

Forum katnaşuçıları da xis-kiçereşlären yaşermäde.

«Sälät – minem küñelem. Sälät bulmasa – bügen yanäşämdä buluçı duslarım belän tanışa almas idem. Sälät bulmasa, min bolay uk aktiw ta bulmas idem. Sälät bulmasa, törle konkurs-olimpiadalarda kattnaşmas, törle ürlärgä ireşmäs, ciñülär yaulamas idem. Sälät, bulganıñ öçen räxmät!» – di Elwira Camaletdinowa.

«Sälät – üzençälekle matur dönya. Biredä min tulısınça üzgärdem. Şuşı dustanä mönäsäbät öçen räxmät! Tanış äydamannarımnı, bäxetle sälkşelären yözen kürügä çiksez şat idem. Sörännär genä ni tora! Forumnıñ masştabı üskännän üsä. Däwamlı bulsın!» – dip belderde Alla Manina.