Tatarçta Debatl ← kire kaytirga
10-nçı mayda Sälät Yortında tatarça debatlar buença IV «Bezneñ fiker» Ligasınıñ yarımfinalı häm finalı uzdı. Anda Kazannıñ törle mäktäplärennän dürt komanda katnaştı.
Liganıñ soñgı etabı turında proekt citäkçese Läysän Miñnullina belän söyläştek.
– Bıelgı sezon elekkelärennän närsäse belän aerılıp tordı? Üzençälege närsädä ide?
– Bez, yagni oeştıruçılar öçen här sezon da üzençälekle häm törle. Çönki el saen yaña katnaşuçılar östälä, alar uenga üzlärençä yañalık kertä. Bıel bez uzgan elgıga karaganda keçeräk yaştäge balalarnı cıydık. Katnaşuçılarnıñ urtaça yaşe 12-16 yaş ide. Şulay uk elekke sezonnarda katnaşıp karagan olırak balalar da kilde, alar oeştıruçılar belän yaña katnaşuçılar arasında dustanä mönäsäbät tudırırga yardäm itte.
– Sezonda barlıgı niçä komanda katnaştı?
– Barlıgı 40 komanda, yagni 80 bala katnaştı. Şularnıñ yakınça 15 protsentı – uzgan ellarda da katnaşıp karagan balalar. Barısı da Kazan mäktäplärendä ukıylar.
– Final programması niçek tözelgän ide?
– Bıelgı final elekkege ellardagıdan aerılıp tordı. Berençedän, yarımfinal aldınnan bez böten katnaşuçılar öçen dä razminka uzdırdık, çönki çıgış yasauçılarga tawışların da, fikerlären dä rätkä salırga kiräk (elmaya). Finaldan soñ berençe tapkır 4 sezonnıñ iñ yaxşı keçkenä oratorları arasında spikerlar bäygese oeştırdık. Parlament debatları öçen bu – yañalık. Bez anı spikerlar bäygese räweşendä oeştırırga buldık, här çıgış yasauçıga äzerlänergä wakıt birdek. Berençe tapkır öçen bik kızık häm aktiw uzdı. Katnaşuçılar kauşadı, älbättä, bu alarnıñ çıgışları wakıtında da sizelde. Debatlda Iskändär Bikmullin ciñde, ul Liga açılışı könne uzdırılgan Debatlda da ciñgän ide. Ul berläşmägä bıel gına kilep kuşıldı äle, tik bu anı tuktatıp kalmadı.
– Katnaşuçılarnıñ äzerlege niçek ide?
– Yarımfinalga aldan äzerlänmädelär. Bilgele könne genä üz temaların beldelär häm alarga äzerlek öçen 10 minut wakıt birelde. Ä bolay yarımfinalga kadär balalar uennarga bezneñ belän häm trenirowkalar wakıtında äzerlände.
– Kiläse elga närsäne yaxşırtırga kiräk?
– Barısı da yaxşı uzsa da, härwakıt keçkenä genä citeşsezleklär bulmıy kalmıy. Menä şularnı buldırmaska tırışırga kiräk. Kiläse elga uenga katnaşuçılarnı saylauga igtibarnı arttırırga häm alar belän eşläüneñ başka formatların ezlärgä kiräk dip sanıym.
– Katnaşuçılarga teläkläreñ.
– Proektnı tämamlap çıkkannarga uñışlı cäylär telim. Härbersen Sälätneñ cäyge alannarında häm, gomumän, Sälät proektlarında küräsem kilä. Min alarnıñ barısın da bik yarattım. «Bezneñ Fiker»neñ 4-nçe sezonı i dus häm tatu sezon bulıp kalır dip ömetlänäm.
*Debatl - batl räweşendä uzdırılgan uennıñ ber töre.