Balalar ni öçen «Sälät-Olimp»nı yaratalar ← kire kaytirga
«Sälät-Olimp» fän olimpiadalarına, TDI häm BDIga äzerläü mäktäbe berençe tapkır Saba rayonında uzdı. 32 ukuçı kanikulların «Sälät-Olimp» kışkı smenasında, «Mingär» kompleksında ütkärdelär. Ukıtuçılar belän ütkärelgän 6 sägatlek däreslärdän tış, balalar wakıtların faydalı, kızıklı itep uzdırdılar: taudan şudılar, yanäşädä urnaşkan Söembikä manarasın kararga bardılar, basseynda yözdelär.
Nadir Kuramşin, proekt citäkçese:
-Smena bik şäp uzdı! Uñaylı şartlar, köçle ukıtuçılar, cılı atmosfera – monıñ dälile. Balalar bik kanägat kaldılar. Traditsion intellektual çaralar üzläreneñ yañalıkları belän şakkatırdı. Şulay uk berençe tapkır popkorn, xot-doglar aşau, kino karau belän yaña el kiçe istä kaldı. Balalar yal ittelär, belemnär aldılar, köçlär tuplap, yaña uku çiregenä äzerländelär.
Kamilä Gıylfanowa:
- Älege smenada min berençe tapkır. Monda miña bik oşadı. Berençedän, keşelärneñ siña karata mönäsäbätläre şakkatırdı. Min berkayçan da şundıy ixlas keşelärne kürgänem bulmadı. Yuk! Şäxeslärne! Kiläçäktä alarnıñ härberse dä zur däräcägä iya bulularına min ışanam. Smenaga barırga iñ elek kurıktım, bik borçıldim. Yukka gına bulgan! Berençe könne ük min barısı belän dä tanışırga ölgerdem. Awırlıklar bulmadı, härberse belän dä urtak tel taba aldım.
Ikençedän, smenadagı äydämannar, ukıtuçılar – iñ şäpläre! Şundıy kızıklı uku-ukıtu programması öçen barısına da bik zur räxmät! Sez – ürnäk keşelär!
Öçençedän, uku-ukıtu programmasına igtibar itäse kilä. Däreslärdä, bez, mäktäptä äle bulmagan temalarnı öyrändek, aña da karamastan barısı da bik añlaşıldı. Miña karaganda, matematika ukıtuçısı, yaña belem aluıma kübräk şatlandı. Temalarnı tormışta bula torgan xällär belän bäyläp añlattı. Min ber genä sekundka da monda kilüemä ükenmädem. Bik şatmın, xätta kitäse dä kilmäde. Hiçşiksez, cäy köne monda kabat kiläçäkmen.
Emiliya Lukoyanowa:
- Min «Sälät-Olimp»nı 3 närsä öçen yaratam. 1. Uñaylı urında uyanu, yaxşı keşelär belän uñışlı könne uzdıru. 2. Sälät moxitenä kerep kitü. Cäyge alannarda 18 kön bulsa, monda bezneñ 5 kenä kön bar. Şul wakıt eçendä üzeñne açıp ölgerergä kiräk. Bu bik kızık. 3. Üzemne törle yaktan açırga, Sälät dönyasına kerep kilüçelärgä gailä moxiten tudırırga yaratam. Eldan-el min Sälätkä gaşıyk bula baram.