Änwär Xäyri – bezneñ yöräklärdä yaşi ← kire kaytirga

2-3 dekabr könnärendä «Fänsar» fän häm mägarif üzäge, Bilär cirlegendä 60 artık keşe sälätle publitsist, ostaz, Sälät xäräkäteneñ yakın dustı Änwär Xäyrigä bagışlangan «Änwär Xäyri ukuları» Respublikaküläm yaşlär fänni-gamäli konferentsiyasendä katnaştı.

«Bik matur çara oeştırgansız. Änwär Xäyri belän tanış bulganıma min bik gorurlanam. Ul bik gadi, açık keşe ide. Üzeneñ klasstaşlarına törle ekskursiyalär yasagan, alar belän gel aralaşıp yaşägän. Mondıy kiçälärebez  bik kiräkle.Kaxarmannarıbıznıñ tormış yulların, kazanışların, uyların belep yaşäü bik faydalı», – dip belderde Alekseewsk rayonı xakimiyate citäkçese - Miftaxow Räwgat Cäüdät ulı.

Konferentsiyaneñ möxtäräm kunakları arasında Tarix fännäre doktorı, arxeolog, Tatarstannıñ atkazangan fän eşleklese Tatarstan Respublikası Fännär akademiyase akademigı Xucin Fayaz Şärip ulı; Bilär däülät tarix, arxeologiya häm tabigat muzey-tıyulıgı citäkçese Kutuew Änäs Abdraxman ulı; Kazan federal uniwersitetı Xalıkara mönäsäbätlär häm tarix institutı dotsentı Şakirow Zöfär Gomär ulı; Gabdulla Tukaynıñ ädäbi muzee citäkçese Töxwätowa Güzäl Färid kızı; Tatarstan Respublikasınıñ atkazangan mädäniyat xezmätkäre Wäliäxmätow Xösäin Xäsän ulı; Bötentatar ictimagıy üzäge ägzası  Kurmaşew Rifkat Gabbas ulı katnaştı. Konferentsiyagä Änwär Xäyrineñ tormış iptäşe Almira Xäyrineñ kilüe bigräk tä kuanıçlı buldı.

«Änwär Xäyri ukuları» Respublikaküläm yaşlär fänni-gamäli konferentsiyasendä 17 dokladçı katnaştı. Alar arasında Sälät aktiwistları da bar ide. Ekspertlar tübändäge eşlärne aerdılar:

-«Şäcärä – gailä közgese», Garipowa Gölsinä;

-«Minem mäktäbem urnaşkan uram», Ismägıylowa Gölnaz;

-«Ikençe gimnaziyam – xıyalıy balaçagım », Gıylmanowa Alsu;

-«Tugan awılım – Çuprälem tarixı», Siraciewa Aysılu;

-«Minem yaktaşlarım – Battallar gailäse», Gıymadiewa Aida;

-«Tugan awılım – Kıyazlım», Moratşina Läylä;

-«Uramım tarixı», Xuccätow Albert.

Proekt citäkçese Nasibullina Elina:

-Älege çara bik matur häm cılı ütte. Berençe kön Änwär Xäyri istälegenä bagışlandı. 2017-nçe elnıñ 2-nçe dekabrendä Änwär Xäyrigä 70 yaş tulır ide. Bu könne Änwär Xäyrineñ dusları, gailäse anıñ belän bäyle bulgan bik matur, küñelle wakıygalarnı iskä töşerdelär. Ul cämägat eşleklese, çın galim, böek keşe ide. Kiçen icadi çara uzdı. Monda barlık teläüçelär yaratkan şigırlären söylädelär, cırlar cırladılar. Fayaz abıy Xucin üzeneñ moñlı tawışı belän bezne şakkatırdı. Ikençe könne katnaşuçılar professorlar, fän eşlekleläre aldında üzläreneñ fänni eşlären täkdim ittelär, ekspertlardan faydalı mäglümatlar tupladılar. Barlık katnaşuçılarga bik zur räxmät äytäse kilä, bigräk tä Änwär Xäyri ukularına zur öleş kertkän bezneñ ostazlarıbız – Ädip Älmir häm Fayaz abıy Xucinga.

Katnaşuçı, Alsu Gıylmanowa:

-Min uylamaganda gına Änwär Xäyri ukularında katnaşırga buldım. Soñgı könne genä garizanı tutırdım häm fänni eşemä alındım. Miña şaltratıp, konferentsiyadä katnaşırga çakırgaç, min bik şatlandım. Üzeñne kürsätergä, tugan yagıñnıñ tarixın söylärgä, yaña duslar tabırga – bu menä digän mömkinlek. Ukular bik matur uzdı, barısı da bik yaxşı oeştırılgan ide. 2 kön eçendä üzem öçen bik küp yañalık taptım. Kauşarga urın kalmadı, çönki konferentsiya bik räxät uzdı. Min gimnaziyamneñ tarixı belän katnaşuçılarnı tanıştıra aluıma, fänni eşemneñ TOP-5kä elägüenä bik şat. Kiläse elga şulay uk Änwär Xäyri ukularında katnaşırga planlaştıram.